Home Politica Lider di MEP ta viaha PA Hulanda

Lider di MEP ta viaha PA Hulanda

0
0
SHARE
- Advertisement -

ORANJESTAD    (AAN):  E siman aki un delegacion di MEP lo viaha pa Hulanda, y lider di MEP a elabora riba esaki durante conferencia di prensa di MEP.

“Nos lo asisti na e reunionnan interparlamentario cu demas paisnan den Reino, esta Hulanda, Curacao y Sint Maarten. Durante e reunionnan interparlamentario nos enfoke lo ta con e demas paisnan den Reino por yuda nos cu e problemanan mas urgente, especialmente combati criminalidad y problemanan social.

SITUACION FINANCIERO DI PAIS ARUBA

Pero aparte di esey nos tin cita cu algun minister hulandes tocante e situacion financiero di nos pais. Nos lo presenta e nota “Feestvierend ten ondergaan” na tur miembro di Parlamento Hulandes, di Curacao y di Sint Maarten, y na gobernantenan hulandes. Nos lo splica nan cu e meta di e nota ta pa start un discusion nacional riba e situacion financiero di nos pais, pasobra nos gobierno keto bay no ta realisa e seriedad di e situacion.

SUPERVISION

Aparte di esaki nos lo busca informacion tocante e intencion di Hulanda pa bin cu supervision. Pasobra nos ta hayando hopi señal cu tin un forma di supervision na caminda, pero prome minister Mike Eman ta nenga esaki categoricamente. Un hende ta gaña, y nos ta bay haya sa ta ken. Pa esaki nos lo reuni tambe cu algun otro instancia pa haya un miho bista cu kico Hulanda ta bezig y kico esaki kiermeen pa Aruba. Especialmente kico esaki kiermeen pa nos autonomia.

CASONAN DI BELASTING

Tambe lo mi reuni cu miembronan di corte di casacion, Hoge Raad tocante e problema cu nos tin na Aruba cu no por apela casonan di Belasting. Nos conose un instancia so, y si bo perde bo caso eynan bo no por haci nada mas. Nos mester di un di dos instancia pa bo apela. Esaki lo haci e sistema di cobra belasting mucho mas husto, y awor cu politica a infliltra den departamento di belasting, e cuidadano tin mester di hopi mas seguridad.

Colega Andin Bikker a pasa un mocion na Hulanda cu Corte di Casacion di belasting tambe por revisa nos casonan di belasting, pero tanten nos no tin un di dos instancia na Aruba mes, bo no por yega na Corte di casacion. Mi biahe tin como meta pa percura pa e di dos instancia aki bin mas pronto cu ta posibel.

PARTIJ V.D. ARBEID

Mi lo probecha tambe pa bishita nos coleganan di Partij van de Arbeid, nos partido ruman, pa estrecha lasonan y mira con por traha hunto.

Ta un siman hopi pisa, cu hopi compromiso, pero cu e determinacion pa saca di e biahe aki e miho probecho pa henter e pueblo di Aruba” segun lider di MEP.

- Advertisement -

DUNA COMENTARIO

Please enter your comment!
Please enter your name here