Home General Lider Politico Rudy Lampe no mag di haci misa mas y tampoco...

Lider Politico Rudy Lampe no mag di haci misa mas y tampoco duna les na schoolnan catolico

3
0
SHARE
- Advertisement -

Decision direct di Vaticano!

ORANJESTAD(AAN): Riba e mesun fecha historico cu Benedicto XVI a renuncia como Papa, a drenta na vigor tambe un decision di Vaticano cu Rudy Lampe a perde su status clerigal.

   “Mi kier pidi comprension na pueblo di Aruba, pasobra for di awe mi ta perde e status di Pastoor of Pader basa riba un decision di Santo Sede di Roma,” Lampe a bisa den un declaracion duna.

El a splica cu na 2005 (november), el a huramenta como Parlamentario y dos siman despues el a ricibi un carta di e Nucio, kende ta representante di Papa pa region di Caribe, cu Roma ta dun’e dos siman pa renuncia como Parlamentario, ya cu den derechonan canonico ta para cu un sacerdote no por asumi un posicion publico sin autorisacion di Obispo y “Monseñor Secco no a dunami autorisacion, manera mi a spera, pa asumi e posicion di Parlamentario.

Na Hulanda y na hopi pais tin centenares di caso di Obispo y Sacedote cu na mesun momento ta Parlamentario.” Lampe a sigui splica cu despues cu e no a haya autorisacion di Roma, el a skirbi un carta pa Papa Benedicto na 2006 den cual e ta bisa cu e no ta renuncia pasobra el a worde eligi democraticamente. Door cu e no a renuncia, el a pidi mesora dispensacion di su obligacionnan clerigal pa keda den Parlamento. Despues el a perde eleccion na september, 2009, y october e tabatin un combersacion cu Monseñor Secco pa asumi back un funcion sacerdotal y a propone, pa bira Pastoor di Rincon na Bonaire cu tabata vacante. Pero esaki a worde rechasa door di Monseñor Secco, kende tabata di opinion cu na januari, 2006 Lampe a tuma un decision caba pa distancia su mes di e funcion di Pastoor. Y shete aña despues e proceso a keda finalisa cu e ta perde e status clerigal.

   “Nunca tabata mi intencion pa drenta politica. Ora cu mi a worde obliga, riba ordo di di Monseñor Ellis, pa bini Aruba pa atende e negociacionnan cu Gobierno cu kier a kita e identidad catolico for di e schoolnan. Ya caba a kite for di Huishoudschool y Obispado tabata na punto di perde e MAVO-nan. Bou di e circumstancianan ey Monseñor Ellis a pidimi pa bini Aruba. Ora cu mi a nenga pa bini Aruba, Monseñor Ellis a recordami riba e promesa di obediencia cu mi a haci. Mi prome confrontacion politico tabata pa e asunto di schoolnan catolico,” Lampe ta recorda. Hasta tabatin diferente marcha. Despues di esey a bini diferente asunto politico, su detencion durante asunto di manifestacion. “Esey tabata un turning point den mi bida pasobra nunca mi a spera cu na mi mesun pais un Gobierno di un forma inhusto por trata un sacerdote manera mi a worde trata. Pesey mi a trata di cambia e sistema politico na Aruba via un forma democratico.”

   El a sigui bisa cu lamentablemente, el a kere cu e lo haya apoyo di Obispo, despues cu tur cos a cuminsa pa trata di defende catolicismo na schoolnan na Aruba. El a agrega cu e no ta arepenti di su escogencia, ya cu ta su fe cristian a hib’e na e compromiso aki y “mi sa cu tin hopi otro obispo y sacerdote cu a cana e mesun caminda cu ami a cana y nan no tabatin conflicto cu nan consenshi. Na final di cuenta, un Sirbidor di Dios ta un sirbidor di Pueblo. Y sirbiendo pueblo, ta sirbi Dios.”

- Advertisement -

DUNA COMENTARIO

Please enter your comment!
Please enter your name here