Home General Minister Jeanine Hennis-Plasschaert masha positivo di Aruba

Minister Jeanine Hennis-Plasschaert masha positivo di Aruba

2
0
SHARE
- Advertisement -

ORANJESTAD   (AAN):   Minister di Defensa Hulandes Jeanine Hennis-Plasschaert tabata na Aruba riba un bishita di trabou. Riba su prome dia el a topa cu Gobernador di Aruba sr. Refunjol y tambe Prome Minister Eman.

Un bishita di e Minister di Defensa na Marinierskazerne Savaneta ta evidente. Hennis-Plasschaert a keda impresiona. “E trupanan aki ta den forma y bon entrena. Mi ta masha satisfecho cu esey. Remarcabel ta cu tur hende ta masha entusiasma aki”. Minister Hennis-Plassaert ta convenci cu e mariniernan na Aruba ta prepara pa tur tarea cu nan haya nan mes confronta cu nan.

    Diaranson mainta e minister a haci un bishita na Marinierskazerne pa mira pa su mes con e militarnan na Aruba ta traha. El a haya un demostracion di un ehercicio riba lama. Militarnan a bin riba cuatro boto di rubber y tres di nan a pone nan hendenan na tera.

Un parti di e hombernan a habri e atake riba un blanco riba lama, mientras cu e otronan a percura pa e defensa. Masha lihe e ‘enemigo’ mester a rindi. Despues di e ehercicio aki Minister Hennis-Plasschaert a cera conoci cu un parti di e grupo y a haya informacion di e armanan cu a wordo uza.  
    A sigui un demostracion di ‘crowd control’. Un grupo di ‘demostrante’ a nenga di para su accion y a wordo obliga di haci esaki dor di un unidad militar. E militarnan a wordo ataca cu ‘palo y molotov cocktail’, pero a logra toch pa den un forma trankil plama e grupo for di otro. Despues di a presencia e demostracionnan aki e minister a declara cu kazerne na Aruba ta keda habri y cu e no ta forma parti di e reorganisacion enorme cu ta tumando luga den Defensa. “Ta berdad cu 12.000 funcion ta disparce. Otro aña nos mester haci mas ainda pa pone finanzas na ordo, pero esaki tampoco tin consecuencia pa Aruba”.

    Hennis-Plasschaert ta haya e presencia di Marina Hulandes den e parti Caribense di Reino hopi importante. “Nan tin tareanan importante, no solamente pa loke ta ayudo militar, pero tambe den combatimento di tur sorto di forma di criminalidad”. Den compania di Comandante di Forsanan Arma Tom Middendorp e minister ta bishitando e islanan ABC e siman aki. Middendorp tambe ta hopi positivo di Aruba. “Ta importante pa mi por a mira cu mi propio wowonan kico exactamente ta wordo haci aki y con e tareanan ta reparti. Diamars nos a haya un imagen di e cooperacion cu gobierno y mi no por bisa otro cu Aruba ta trahando hopi bon. Sigui asina”. E tambe a afirma cu e austerisacion den Defensa na Hulanda no tin consecuencia pa Aruba. “Nos a haci acuerdonan cu e parti Caribense di Reino y nos ta cumpli cu nan”.  
    General di Brigada Dick Swijgman, kende tin e posicion di director di Kustwacht di Region Caribense, a subraya cu Kustwacht t’ey mas tanto pa garantisa siguridad den e region. “Nos ta haci esaki na diferente manera. No ta mucho tempo pasa cu nos a gara algo grandi riba tereno di criminalidad cu ta crusa frontera. Dentro di poco nos lo duna mas informacion riba esaki. Pa a logra tira man riba e criminalnan aki nos a traha intensivamente cu Kustwacht di Colombia y Venezuela”. Swijgman ta sigui bisa cu e welga na Corsou no tin consecuencia pa e funcionamento di Kustwacht eynan. “Nos a manda trupanan di Aruba y Sint Maarten eynan. Esaki ta nifica oranan extra di trabou, pero asina e siguridad no ta core peliger.

- Advertisement -

DUNA COMENTARIO

Please enter your comment!
Please enter your name here