Pos Chiquito Complex, awe un joya pa biba aden

Publication: Monday, 4 March 2013. Categoria: General

Su borchi a wordo devela door di Prome Minister Eman y Minister de Meza

ORANJESTAD   (AAN):  Otro proyecto pa Pos Chiquito parcialmente a wordo entrega na Gobierno diabierna ultimo den presencia di invitado y habitantenan.

Renobacion di Pos Chiquito complex ta forma parti di e plan di renobacion di barionan di Aruba cu a cuminsa caba na Juwana Morto Complex y cual a resulta den un cambio grandi den calidad di bida pa e habitantenan.

    Diabierna Prome Minister Mike Eman, su colega di Finanza, Mike de Meza, Presidente interino di Parlamento Chris Dammers y Parlamentarionan Desiree Croes y Clarisca Velasquez, tabata presente na e ceremonia na Pos Chiquito unda cu e prome serie di renobacion di casnan di e compleho a keda cla y entrega na FCCA.

“E ta birando un joya pa biba aden,” ta algun di e comentarionan cu por a scucha e atardi aki. Un dia prome Premier Eman tabata di bishita den bario di Pos Chiquito cu un accion di limpiesa hunto cu funcionarionan di SERLIMAR y GKMB.

      A informa nan na e momento ey di e proyecto aki cu su prome fase ta cla pa su inauguracion pero tambe a probecha pa staciona diabierna atardi e bus di salud unda habitantenan por a haya un control di nan salud. Premier Eman den su discurso a papia di e plannan di su Gobierno di cual un gran parti ta pa mehora e poder di compra di e ciudadanonan y alabes crea un miho calidad di bida, manera cu ta tumando luga den barionan cu mas iluminacion, camindanan asfalta, areanan di recreacion pa chikito y grandi.

     E tres complexnan existente ta na Juwana Morto (52), Jara (43) y Pos Chiquito (56). Na mesun momento e Prome Mandatario a ilustra loke su gobierno a bin ta haciendo den bario di Pos Chiquito. A drecha veld di Universal cu tabata den un un deterioro total, e bini cu incentivonan cu a logra cende e luznan atrobe y a construi un looppad rond di e veld cu ta permiti e habitantenan haci ehercicio sin ningun peliger.

      Pa e proyectonan cu Gobierno ta ehecutando, Prome Minister tabatin masha palabra di gradicimento pa su colega Mike de Meza, kende ta esun di cu ta haci tur e ehercicionan financiero pa logra haya placa pa e proyectonan social aki.

     E titular di Finanza den su discurso a bisa, despues di mira e proyectonan di bario na Juwana Morto, de Vuyst, Village, Yara y Pos Chiquito, cu e ta masha contento y a invita ehecutivonan di FCCA pa sinta na mesa pa mira con e institucioin aki por haya mas placa pa realisa mas di e tipo di proyectonan aki, na un interes mas faborabel.  Pero ta den tur skina di Aruba, Gabinete Mike Eman ta hiba e renobacion di structuranan y duna un miho calidad di bida. E ceremonia oficial a finalisa cu desvelo di borchi di e proyecto, door di Prome Minister Eman y Minister di Finanza Mike de Meza, kendenan a keda basta largo pa combersa y celebra cu e habitantenan.

Leave a Reply