Proyecto pa comberti desperdicionan den energia ta den desaroyo tambe na Aruba

Publication: Monday, 4 March 2013. Categoria: General

Gobierno, Utilities y WEB Aruba NV ta bezig:

ORANJESTAD (AAN) – Actualmente tin diferente opcion pa genera gas pa WEB Aruba NV, door di sushi produci riba nos Isla.

Den entrevista cu Minister Mike de Meza, el a splica na Matutino DIARIO, con e proyecto aki ta bay cana.

El a duna di conoce cu su colega di Infrastructura y Medio Ambiente, señor Sevinger, ta trahando riba e aspecto aki.

E dignatario hunto cu expertonan di WEB Aruba NV ta sinta na mesa pa analiza kico ta e mehor proceso pa deshaci di e sushi produci na Aruba, y na mesun momento pa converti e desperdicionan den un producto cu tin un balor, cual ta e produccion di energia.

“ Esaki ta un proceso cu mundialmente ta wordo uza, y na Aruba tambe nos ta studiando cual ta e mehor manera pa hacie y cual ta e mehor companianan cu por desaroya e proyecto aki mas exitosamente posible”, Minister de Meza a indica.

E sushi uza pa esaki ta desperdicio residencial y di comercio pero cu not a restonan di material di construccion manera cement, asfalt, etc., pero material cu por wordo kima y converti den energia of gas na un manera responsable, pa saca calor for di dje pa draai e turbinanan pa genera electricidad.

E dignatario a subraya cu esaki ta un proceso cu ta cumbini Aruba, pasobra te aworaki e desperdicionan ta wordo tira na Parkietenbos y e landfill ta keda aumenta y bira mas grandi y eigenlijk Aruba no por sigui di e forma aki.

Esaki ta nifica cu mester bay mira con pa reduci e cantidad di desperdicionan produci na Aruba y vooral e volumen cu ta wordo hiba na Parkietenbos. Pero na mes momento hacie na un forma responsable, efectivo y cu por saca dije un producto cu ta energia, cual tin un balor monetario y cu por yuda baha e prijs di coriente y hasta logra pa esaki baha mas tanto posible.

Minister Mike de Meza a agrega cu tin varios diseño riba mesa caba y nan ta bastante adelanta. Pero decisionnan mester wordo tuma y ora esaki sosode ta bay over na ehecuta e proyecto pa e bay den operacion mas lihe posible.

Aparatonan importante, segun e dignatario, ta wordo diseña na WEB Aruba NV mes, pa genera energia sea via fosil likido of gas fosil, y den esakinan tin algun cambio pa haci cu WEB mes ta bezig cune, y gobierno hunto cu Utilities tambe ta trahando riba esaki.

Ta trata aki di proyectonan grandi cu por tuma di un aña pa un aña y mey of dos aña, y nan tey for di tempo di e refineria conhuntamente cu gobierno pero como cu e refineria a cera su porta, WEB Aruba NV a tuma nan over riba su mes, no solamente pa loke ta concerni gas natural pero LNG tambe.

Leave a Reply