Si acaso tin reservanan den nos subsuelo un maneho responsable lo wordo garantiza!

Publication: Saturday, 2 March 2013. Categoria: General

Gobierno ta trahando riba un ley:

Ningun famia por saca probecho personal

ORANJESTAD (AAN) – Den entrevista cu Matutino DIARIO, Minister Mike de Meza, titular di Finanza, Energia y Empresanan Estatal, a referi na e prome trabaonan di sondeo den nos awanan teritorial cu ya caba a cuminza.

Un compania specializa via di Rapsol ta bezig ta haciendo e investigacionnan den nos awanan teritorial (investigacion demografico tridimensional), y nan tin dos siman activo den esaki y e por tuma di trinta pa cuarenta dia.

Despues lo tuma mas of menos cien binti dia pa haci e analisis y procesa e informacion cu nan haya y analiza esaki door di e geologonan.

E ora ey nan lo informa e resultadonan di esaki na gobierno di Aruba y lo sigui pa scoge cierto areanan pa haci un mapping tridimensional.

E mandatario a compara esaki cu un test medico caminda tin RX y MRI.

Un RX unda cu potretnan ta duna informacion menos detaya pero cu bon indicacion di henter e awanan teritorial di nos Isla tumando e parti pazuid, pabao, pariba y panoord di Aruba cu ta nifica casi 120 kilometer pafo.

E mapping tridimensional por wordo considera mescos cu un MRI, unda cu ta bay mas detaya y fuerte, riba diferente nivel di nos subsuelo di lama y si tin indicacion di reservanan kico probablemente esakinan por ta, y despues, den discusion cu gobierno, lo bay over na boramentonan di prueba, pa wak kico ta e temperatura, presion, e likido si ta petroleo of gas fosil.

Esaki ta un proceso cu ta tuma su tempo, pero nan ta bayendo relativamente lihe cu esaki y riba e nivel di tecnologia mas halto cu ta existi na mundo ta wordo uza pa e investigacion y exploracion aki.

E dignatario a subraya cu ohala e noticianan ta manera e expectativanan di tur experto na e momentonan aki cu ta sumamente positivo, riba e posibilidadnan pa Aruba, no solamente basa riba e informacionnan cu tin di e area di Aruba sino tambe di datonan cu a wordo reprocesa di cabamento di añanan ochenta.

E mandatario a indica cu si acaso tin reservanan depende si ta gas of likido, por tuma algun aña prome cu bay den explotacion y produccion.

Mester sa con profundo e subsuelo ta, di kico e ta consisti si e ta den e area mas, of menos, profundo di nos lama y con grandi e reservanan ta. Pues tin varios factor cu mester tin na consideracion cu e por tarda dos of cinco aña.

E dignatario a subraya cu un bez cu tin prueba cu e reservanan aki ta existi, ya caba e ta algo hopi interesante pa Aruba den su totalidad, y como pais nos mester wak con lihe kier bay na explotacion di e materia prima aki.

Leave a Reply