USA Today cu publicacion grandi y positivo di Aruba

Publication: Monday, 4 March 2013. Categoria: General

ORANJESTAD   (AAN):   Den e edicion di 28 di februari ultimo, Aruba a haya un enorme cobertura internacional cu publicacion di un suplemento di USA Today cu ta presenta Aruba como e green gateway entre Europa y Latinoamerica. Durante algun luna reporteronan di USA Today tabata bishita nos isla pa asina experiencia di un manera propio e iniciativanan di Gobierno di Aruba pa posiciona su mes entre ambos continente y asina duna base na e di tres pilar economico di Aruba: un sector basa riba economia di conocemento, technologia y energia renobable. “Cu mas di 350.000 ehemplar, e vision sostenibel Aruba a wordo presenta hunto cu e matutino USAToday  titula: Aruba – Two Steps Ahead”.

     E industria di turismo a sa di mustra su flexibilidad den e crecemento continuo durante e ultimo añanan a pesar di e retonan grandi cu e mercadonan importante a presenta. “Den cooperacion cu partnernan di Reino, Aruba ta desaroyando su di tres pilar economica den pleno forza”.

Den un futuro hopi cercano Aruba lo ta un gateway completo pa Latinoamerica. Partnernan strategico manera TNO, Gasunie, Carbon War Room, New America Foundation, Harvard, como tambe  pioneronan den sostenibilidad manera Sir Richard Branson y Prof.dr. Wubbo Ockels, ta trahando cu Aruba den espirito di cooperacion, harmonia y bienestra pa yega na un desaroyonan sostenibel den tur aspecto.

     Den e suplemento Aruba a wordo presenta tambe como e  isla di oportunidadnan riba terenonan financiero, transporte, turismo, energia y tambe infrastructura. Maneho di Gobierno di Aruba ta hibando Aruba den un porta di conexion den e industrianan di conocemento, tecnologia y servicionan unda e sector di energia berde local ta sirbi como catalisador di tur e iniciativanan aki participando den e crecemento economico actual di Latinoamerica.

     Varios Arubiano cu tabata di biahe a wordo sorpresa diahuebs  mainta cu e edicion di un di e corantnan nan mas lesa na Merca. „Cu un sentido di emocion, orguyo y satisfaccion nos por a mira con Aruba ta wordo presenta un biaha mas exitosamente den exterior y confirmando asina cu Aruba ta riba e bon caminda,” un di nan a bisa.

Leave a Reply