Velocidad halto y alcohol no ta mezcla!

Publication: Saturday, 2 March 2013. Categoria: Policial

ORANJESTAD   (AAN): Te ainda e investigacion na e lugar mes no a termina, pero for di testigonan cu tabata cu e victima di e accidente fatal, por a compronde cu e tabatin drinks aden y cu nan tabata “spin” na altura di Wendy’s Palm Beach y cu e tabata biniendo hopi duro ora el a perde control.

    E hoben John Mejia ta den flor di su hubentud, apenas algun aña cu el a caba Maria College y ya el a perde su bida den un desgracia pisa Diabierna marduga.

   E tabata su so den auto pero den compania di algun amigo, nan tabata direccion Lekker Bar & Restaurant na Noord.

   E hecho cu su siguiente mainta ta dia di trabao obviamente no a pisa mucho den su evaluacion pa sigui “rek” e trip un poco mas awe diahuebs. E auto tabata bayendo riba un velocidad asina halto, cu el a dal, bay halto, bolter y cay back riba su 4 wielnan.   Testigonan a conta cu e motor a hasta pega candela un rato.
    Un auto cu tabata biniendo tras di e vehiculo a conta cu el a mira con e auto a bay halto, mes halto cu e palo di luz y bin abou back tur na candela. E no a mira pustamento, pero si a sigura cu e auto tabata bayendo duro.

   Es mas, e amigonan a admiti cu tabatin “spinmento” un rato prome pero cu na momento di e desgracia no tabatin ningun pustamento.
   Hecho ta cu e sucedido lamentable aki awor lo mester sirbi como un les hopi duro pa tur e amigonan cu ta apoya e tipo di weganan extremo cu auto, specialmente e grupo di auto cu stuurwiel na man drechi. E prijs cu bo ta paga ta bo bida, y e tristeza cu e tipo di casonan asina aki ta laga atras hamas por hustifica e draaimento di auto, kima taira y pusta riba caminda publico.

Leave a Reply