Home Editorial Editorial: PA MI, E ARGUMENTO DI E FISCAL TA FOFO!

Editorial: PA MI, E ARGUMENTO DI E FISCAL TA FOFO!

1
0
SHARE
- Advertisement -

          Den e caso di e turista Canades na estado cu a muri den un accidente di trafico (hunto cu su yiu ainda pa nace), mi a scucha (un biaha mas!) argumentonan di parti di esnan encarga cu e ehecucion di husticia na Aruba, cu a lagami tur babuca! Con por ta posible cu un Fiscal por a hinca den su cabez cu un persona burachi envolvi den un accidente di auto no ta culpable pa e simple hecho cu, segun e Fiscal, e no a provoke! Mi pregunta ta: den prome lugar, ki mishi un persona burachi sinta tras di stuur riba un caminda publico? Ta berdad of no cu ta ey e causa di e accidente mester ser busca, no den e hecho posterior cu ta e dama difunto mes a causa e accidente ora cu el a sali dilanti di e auto maneha pa e chofer burachi. Logica ta bisami cu e auto maneha pa e persona bao influencia severo di alcohol no mester tabata tey den prome lugar! Si e no tabata tey no por tabata tin un accidente! Un persona burachi, segun nos Leynan, no por ta tras di stuur riba caminda publico!

       No bale la pena sinta discuti cu esnan cu a bin Aruba cu infulanan di grandeza, creyentenan den nan propio sabiduria, y ta tuma decisionnan completamente contrario na loke Ley mes ta stipula. Mi kier a djis duna mi punto di bista riba e episodio tragico ey cu a enluta e famianan di e dama cu a fayece den e accidente hunto cu su yiu cu no a nace ainda. Pa mi, tur e factornan envolvi mester a ser studia a fondo prome cu emiti huicionan cu ta contrario na loke e reglananan di trafico mes ta indica. Con bin e Huez Comisario a laga e persona burachi den libertad inmediato ta un enigma cu ami no ta bay ni purba clarifica, pasobra mi no sa con e hendenan “experto” cu ta bin di Hulanda ta pensa aya tocante episodionan asina. Y como nos ta den nan mannan, mi ta bay laga e asunto te aki, pero enfatizando mi punto di bista cu e culpa no mester cay riba e dama cu a muri so, sino den prome lugar riba esun cu a causa e accidente estando tras di stuur riba un caminda publico completamente burachi! Si e no a viola e Ley di trafico cu ta goberna e materia, nada a pasa!

     Esey ta hibami pa un otro critica cu mi tin, e biaha aki riba e sentencianan dicta pa e Hueznan cu ta bin Aruba, y cu mi ta sigur ta trata di cumpli cu nan tareanan di acuerdo cu e estudionan cu nan a cursa na Hulanda, pero cu aki ta cambia den diferente caso y ocasion.  Mi ta scucha for di Pueblo hopi opinion contrario na e tipo di sentencianan cu ultimamente e sabinan di e materia a dicta. Di mes for di basta tempo pasa mi a perde confianza den e tipo di Husticia cu nan ta impone na Aruba, un isla cu nan no conoce y un Pueblo cu tin un idiosincracia completamente diferente na esun cu nan a custumbra na dje na nan pais. Nos ta papia un idioma straño pa nan y cu a duras penas nan ta siña balbucea. Mi ta haya cu a bira tempo pa cuminza pensa den otro direccion, y considera si ta necesario cambia partinan importante di e sistema cu nos tin, aunke mi ta compronde e logistica dificil su tras. Si esey no ta posible, anto mester por pensa riba Hueznan y Fiscalnan Arubiano, ya cu mi ta supone cu riba nos isla mester tin un bon cantidad di personanan bon prepara pa eherce ambos funcion. Mi ta corda e bon trabao cu un Arubiano a eherce den e campo ey, y mi ta referi aki na Florencio Wernet. Mester por tin otronan cu igual capacidad y igual boluntad pa sirbi nan isla.

    Nos ta para riba e umbral di cambionan grandi cu ta bay sosode riba nos isla, y ta premira un control mas severo cu Hulanda ta bay eherce akinan, no solamente riba nos asuntonan financiero. Mi no ta kere cu e ta bay tin influencianan grandi riba nos autonomia o nos Status Aparte, pero ta bon pa nos prepara nos mes mentalmente pa e cambionan cu ta na caminda. Nos no por siña pensa manera e Hulandesnan, pero ta importante pa nos sa di antemano si nan ta dispuesto di siña pensa manera nos Pueblo ta pensa. Al fin y al cabo, Aruba ta di nos, no di nan, y ta toca nos defende cu alma, curazon y curpa. Algun for di e arena politico, y otronan for di medionan di comunicacion. No conta cu ami, por ehemplo, ta bay bira lomba pa motibo di temor o compleho, pasobra mi no ta sufri di ningun di nan dos, pero si ta sinti mi amor patrio core for di mi curazon te den e extremonan mas remoto di mi curpa. Y te unda cu Dios dunami bida lo mi tey pa ofrece mi opinion y mi criticanan contra loke mi ta considera por causa daño na mi isla.

               

                 

 

 

- Advertisement -

DUNA COMENTARIO

Please enter your comment!
Please enter your name here