Home Editorial Editorial: UN PROME MINISTRO EFECTIVO

Editorial: UN PROME MINISTRO EFECTIVO

0
0
SHARE
- Advertisement -

               E acuerdo importante cu Aruba y Hulanda a firma dia 28 di Maart 2013, ta en realidad e coronacion di e prome termino di Gabinete Eman. E ta, principalmente, un muestra di confianza mutuo entre e dos paisnan, y cu ta bay hopi mas leu cu e contenido di e acuerdo. Despues di a crea perspectivanan social y economico atrobe na Aruba, y di a trece harmonia y trankilidad back riba nos isla, Mike Eman y su Gobierno a logra fomenta un confianza grandi di mundo den e stabilidad politico, social y economico di Aruba. Loke a keda pa soluciona ta e problema di finanzanan publico, cu den nos caso no a yega extremonan grave di crisis, pero cu na hopi otro pais a desborda tur limite tolerable.

                       Hibando un maneho balancea dirigi riba e recuperacion social economico local, cu e participacion di tur gremio den Dialogo Social, y na e mesun momento reduciendo gradualmente e deficit di Pais Aruba, Gobierno a bin ta ganando e confianza di e agencianan di rating mas conoci, manera Fitch y Standard & Poor, y awor di Reino Hulandes.

                         Loke Gabinete Mike Eman ta logrando ta un modelo cu hopi Pais ta buscando ainda: o sea un balans entre duna suficiente oxigeno na bo economia, stimula poder di compra, yuda esnan mas vulnerable, crea perspectivanan pa crecimento di economia y empleo, haci inversionnan cu ta causa un impacto duradero, garantiza un recuperacion sostenible, y alavez concentra riba e reduccion gradual di nos deficit. Loke hopi pais ta luchando cune ainda, Gabinete Mike Eman ta logrando caba cu un liderazgo consistente y admirable.
 
                      Awe Aruba no ta unicamente un ehemplo di un modelo husto, pero ta tambe un factor excepcional den e creacion di un ekilibrio social economico.  Aruba por ta chikito y hasta simple, pero e ta birando e lider den Reino pa motibo di e vision cu Prome Ministro Mike Eman a carga durante hopi aña pa un Reino Hulandes cu por funciona a base di e principio di “win-win”, o sea puro ganador.
 
                       Pa bise cu otro palabranan, Prome Ministro Mike Eman ta haya e reconocimento den e acuerdo firma entre Aruba y Hulanda pa su determinacion di ehecuta y converti den realidad e vision grandi cu e tin pa e futuro di nos pais: “als bouwstenen voor dat strategisch parternschap op een aantal terreinen al concrete voorrgang is geboekt, zodat Aruba het bruggenhoofd vormt tussen Nederland en Latijns-Amerika op het gebied van duurzame energie, groene technologie en kennis.”
 
                       Loke ta duna Aruba e reconocimento y admiracion aki no ta e trabao di un idea briyante so, sino un conhunto di idealnan y dedicacion total di Gabinete Mike Eman, cu den nan esencia ta asina husto, humano y corecto cu no por tabata otro cu lat of tempran nan lo a bira un obheto di admiracion y respet na otro paisnan. Pa bo inverti tanto tempo den e buskeda di consensus cu tur gremio, apesar cu bo a caba di gana eleccion cu un mayoria abrumador di 12 asiento, ta un muestra di un afan pa logra e union di e diferente instancianan den e tumamento di decisionnan importante pa nos isla. E ta, ademas, un demostracion cu e Gobierno actual ta kere den inclusion y no exclusion,  den e tumamento di decisionnan grandi pa Aruba, su Pueblo, y bo propio principionan democratico, o sea e balornan cu ta hacibo hende.
 
                     Ta conoci tambe, cu Prome Ministro Mike Eman den su filosofia en relacion cu Dialogo Social, ta sigui hopi di cerca e principio di relacionnan humano y e creencia firme den e balor di dialogo, cu e filosofo grandi di e materia, Martin Buper, a publica den hopi revista academico cu a gana reconocimentonan internacional. E mesun Martin Buper aki a yega di bisa: “A person cannot approach the divine by reaching beyond the human. To become human is what this individual person has been created for.”
 
                       Segun tur evidencia visible, Prome Ministro Mike Eman ta carga e principionan aki den carni y weso. E ta obvio no solamente den e simpleza cu e ta demostra ora cu e ta bishita nos hendenan den e barionan local, sino cu e ta exhibie tambe ora cu e ta na mesa tratando cu opinionnan diverso, respetando nan sin aminora su propio opinion y ideanan. Aruba tin suerte di tin un Gobierno cu ta traha incansablemente pa converti den realidad e ekilibrio cu mester existi entre lo politico, lo social y lo economico.

- Advertisement -

DUNA COMENTARIO

Please enter your comment!
Please enter your name here