“Esaki ta e relacion cu semper nos tabata kier den Reino Hulandes”
ORANJESTAD (AAN): Gabinete Mike Eman a pone como punto central di su gobernacion pa Aruba logra tin stabilidad necesario, mehorando e relacion cu y den Reino. Esaki cu e meta pa mehora e imagen di Aruba y crea respet pa e pais chikito aki den Reino Hulandes.
Esaki ta loke Prome Minister Mike Eman a trece dilanti den un conferencia di prensa na unda el a splica con na Hulanda gobierno di Aruba a logra un acuerdo importante pa refinanciamente di debe di Aruba.
Pais Aruba, e mandatario a splica prensa, a inverti hopi tempo, esfuerso y bon boluntad den cierto cantidad di tema pa por a logra un pensamento comun, riba avance cu por logra trahando hunto. Asina den forma bilateral, a cuminsa cera acuerdonan cu Hulanda, ehempel di esaki ta e protocol di cooperacion firma na october 2011 cu Minister Donner. Den e protocol ta para cu e dos paisnan ta bay traha hunto na bienestar di otro. E ‘Acuerdo di Diahuebs Santo’ ta un resultado di e protocol di cooperacion aki.
Minister di Finanza Mike de Meza a logra baha e interes di prestamonan di Aruba na un alrededor di 4.6% y logra refinancia e debe di Aruba na 2 te cu 2.6%, lo ta un reduccion substancial.
Segun calculonan cu expertonan di Aruba a haci, e suma cu ta paga na interes riba e prestamonan aki ta bira e ora entre 20 pa 40 miyon florin menos a base anual. Eman a indica cu esaki por wordo logra den un tempo relativamente cortico si yega na refinanciamento di un parti importante di debe di pais Aruba.
E Prome Mandatario ta sinti hopi satisfaccion pa motibo cu den e acuerdo firma na Hulanda ta para tambe cu riba e otro areanan cu ta poni den e protocol di cooperacion 2011, a logra caba progresonan importante pa cual Hulanda ta hopi entusiasma. “Pa nos e ‘Acuerdo di Diahuebs Santo’ ta un logro 100%, pasobra e ta muestra di un confianza grandi cu Hulanda a pone den direccion cu pais Aruba ta bayendo y esaki a wordo bisa specificamente door di Ministernan Plasterk y Dijsselbloem, kendenan a comenta riba e forma con Aruba ta atendiendo cu tur e retonan.”
Loke Premier Eman a haya cu a yuda hopi tambe ta cu e dos mandatarionan Hulandes cu a firma e Acuerdo di Diahuebs Santo, ta di partido social democrata y ta reconoce e balansa cu kier trece tratando di logra un presupuesto balansa y na mesun momento percura pa oxigeno pa e economia y pa e ciudadanonan no bira victima di e situacion cu ta reina mundialmente. “E balansa aki, e forma consistente di e maneho cu a wordo hiba e ultimo añanan, a wordo reconoci tambe cu e acuerdo.”
E acuerdo ta bisa cu ora Aruba bay riba mercado internacional pa financia su necesidad di capital, e isla por haci un apelacion riba Gobierno di Hulanda, pa inscribi a base di interes cu Hulanda ta haya riba mercado internacional. Aworaki Hulanda ta emiti bononan riba cual ta paga 2%.
Condicion cu Hulanda ta pone, Eman a splica, ta pa cumpli cu e reglanan di Reino y internacional di finanza di Gobierno y posibilidadnan di por paga bek. Si no cumpli cu e criterianan, mescos cu banco ta pone pa emision di bono, Hulanda ta mantene su derecho di no bay riba mercado internacional pa Aruba. “Esaki ta e relacion cu semper nos a kere cu Aruba merece di tin den Reino Hulandes, di madurez y unda cu no tin supervision riba escogencianan cu bo ta haci, e resultado final ta loke ta wordo midi. Pa nos esaki ta algo cu nos ta hopi contento cune. Nos a demostra tur aña cu nos ta mehorando nos cifranan, cu ta indica na cuanto porciento ta haya prestamonan.”
