Home Hudicial Abogado di Joran van der Sloot no ta conta riba reduccion di...

Abogado di Joran van der Sloot no ta conta riba reduccion di castigo

2
0
SHARE
- Advertisement -

Joran wardando permiso pa casa den prison!

ORANJESTAD    (AAN):  Informenan cu a circula ayera den media internacional ta indica cu ta posibel cu ya caba dentro di 1 siman e hueznan den e caso di apelacion di Joran van der Sloot na Peru, lo duna nan veredicto. Esaki segun abogado di Joran van der Sloot esta Maximo Altez, Diaranzon.

     Diaranzon corte superior di Lima a trata e caso di apelacion di e Hulandes acusa di a asesina Stephany Flores Ramirez di 21 aña na 2010. Normalmente hof ta duna su veredicto despues di 30 dia.

     Altez ta pensa cu e veredicto lo cay hopi mas lihe, door di e atencion grandi cu e caso aki tin den medionan di comunicacion. E abogado no ta conta riba un reduccion di castigo.

    Na comienzo di aña pasa Van der Sloot di 26 aña a haya un castigo di prison di 28 aña y un multa di 50.000 Euro.

    Altez ta haya cu 20 aña lo ta un castigo mas husto. “Sinembargo e presion di media ta grandi”. “Joran a wordo demoniza den prensa”. “El a asesina un mucha muher Peruano y esey ta pisa hopi”, segun Altez.

     E caso di apelacion a tuma lugar Diaranzon y den 5 minuut Altez a trece dilanti dicon e ta haya cu e castigo mester wordo baha.

     Van der Sloot a admiti y el a mustra cu e ta lamenta locual el a hasi, segun e abogado.

    Mañan pa colmo ta bay ta net 8 aña pasa cu Natalee Holloway a desaparece for di Aruba, cu ta un caso den cual van der Sloot tambe tabata e sospechoso principal.

   E abogado di Joran a laga sa cu su cliente kier un bida nobo y pa esey e kier casa den prison. Pa esaki el a solicita caba permiso na e autoridadnan concerni. E contesta pa esaki lo por sosode den e proximo  dos siman, segun Altez.

   E chick di Joran lo ta un mucha muher peruano y segun prensa ta trata di Leydi Figueroa Uceda, kende ta bishit’e den prison. Altez a nenga cu Joran tin un yiu cu e muher aki.

- Advertisement -

DUNA COMENTARIO

Please enter your comment!
Please enter your name here