No ta acepta racismo den parke

Publication: Thursday, 16 May 2013. Categoria: General

Parke Nacional Arikok ta reacciona:

ORANJESTAD    (AAN):  “Nos no ta acepta e tipo di actitud asina. Racismo no ta algo cu nos ta tolera”, asina Diego Marquez MSc, director di Parke Nacional Arikok a duna di conoce.

E ta referi na un articulo cu a sali ayera, den cual un of mas persona a manda pa corant acusando gerencia di e park di lo a tuma “un Chines” cu ta gana hopi placa sin haci nada.

    Drs. Greg Peterson, den su calidad di Presidente di e Hunta di Supervision a sigura cu e articulo aki no ta cuadra cu berdad. E persona cu nan ta considera “Chines” ta un persona local di San Nicolas, educa na nivel “Masters Degree” y cu tabata traha na Valero. E ta encarga cu operacion di e parke y cu gran exito.


“E remarkenan racista den e articulo no ta solamente inaceptabel pa Parke Nacional Arikok pero mi ta sigur cu e ta inaceptabel pa henter nos pais, pa por haci e tipo di remarkenan asina. Mi ta condena e cos aki energicamente, e falta di etica y moralidad pa nos conciudadanonan”, di acuerdo cu Drs. Greg Peterson.
    El a añadi cu “ora nos papia di stranheronan, nos ta papia tambe di nos turistanan cu ta percura pa mas di 70% di nos economia. Ta bon pa tene masha bon cuenta ken nos ta insultando!”
     Parke Nacional Arikok ta pidi disculpa na henter comunidad Chines residencia riba nos isla, pa e forma con un persona ta haci remarkenan asina. Di berdad cu esaki no ta e sistema con nos ta atende cu e asuntonan aki na Aruba. “Pa colmo, como un persona cu a nace na San Nicolas, mi conoce famia Lee for di tempo cu nan tabatin nan negoshi den caya grandi di San Nicolas. Ta un famia bon conoci, bon studia y bon prepara pa sigui traha y lucha pa bienestar di nos isla”, segun Drs. Greg Peterson a splica.
     Di otro banda, Diego Marquez, como director di e fundacion a sigui splica cu “Nos ta riba un bon caminda, trahadonan ta hopi mas trankil y contento cu e desaroyonan den nos parke”. E ta convenci cu mayoria di e empleadonan no ta para tras di e articulo aki y sa tambe cu e contenido no ta cuadra cu realidad. 
     Parke Nacional Arikok ta trahando duro pa por sigui desaroya nos flora y fauna, sigui cuida nos bestianan y conserva cuebanan y areanan den cual ta rico na historia. Pa por logra esaki ta depende di profesionalnan y empleadonan dedica, cu amor y pasion pa e trabou dificil aki. “Pa sali y insulta otro colega cu frasenan di racismo no ta algo tolerabel aki den y ta masha di lamenta”, asina e director di e fundacion a termina bisando. 
     Parke Nacional Arikok ta existi desde aña 2001, ta maneha 34 km2 di tereno, tin 48 empleado den servicio y ta conta cu miles di bishitante anualmente, tanto local como nos turistanan. Mayoria ta opina despues cu Parke Nacional Arikok tin hopi di ofrece, ta opera profesionalmente y ta comparabel na nivel di cualkier park conoci na otro parti di mundo.

Leave a Reply