Pa proyecto gigante di Horacio Oduber Hospital

Publication: Friday, 31 May 2013. Categoria: General

Exigencianan di destaho entrega na e tres companianan cu a bay ultimo ronde

ORANJESTAD(AAN): Na dr. Horacio Oduber Hospital tabatin entregamento di e reglanan di destaho na e tres companianan cu ta participa den e ultimo bidding pa construccion, ampliacion y renobacion di dr.Horacio Oduber Hospital. E companianan aki cu a yega e ronde final ta Ballast Nedam, Bouygues Construction y Arellanos.

   Nan ta e tresnan cu a keda di e nuebenan cu a cuminsa den participacion di destaho di e trabao titanico aki. Nan ta tres compania renombra internacionalmente. Esun cu gana e bidding mester traha cu companianan local di construccion.

   Entrega di e reglanan aki a sosode den presencia di Ministernan Eman y Sevinger y varios compania di construccion local. Minister Visser no por tabata presente pa motibo di tabata den Parlamento contestando pregunta riba su presupuesto.

   E comision encarga cu e trabao di construccion, renobacion y ampliacion di hospital ta Frendsel Giel (AIB), Jossy Figaroa (DOW), Ruben Croes (HOH), Jessy Simon (AIB/SOGA), Theo de Kool (HOH), Willem Broekaert (AIB) y Junior Tromp (Infra-Team) .

   E trabaonan cu ta bay den fase ta cuminsa na final di augustus, cuminsamento di september. E masterplan ta encera cambionan hopi grandi. A tene cuenta cu tur aspecto medico ora a traha riba e plannan pa e hospital di futuro. “E hende ta para central”, asina director di dr. HOH, dr.Falconi a acentua na mas di un occasion. Buro di arkitecto Bermello, Ajamil y partnernan a tene cuenta cu e deseonan di e personal di dr. HOH na momento cu a crea e diseñonan. AIB y SOGA a percura pa financiamento di e proyecto gigante aki cu ta riba di 200 miyon Florin. SOGA despues ta lease e edificio cu gobierno cu na su turno ta dun’e den uso na hospital.

  Prome Minister Eman “Un proyecto cu ta hiba Aruba riba un otro nivel”

  Eman a bisa cu hopi facilidad ya no por cumpli cu e deber di gobierno pa ofrece e ciudadano un calidad di bida husto y na nivel cu nos kier ofrece nos hendenan. “Den e luz ey nos a bisa cu un desaroyo economico sostenibel pa Aruba ta bay rekeri un miho relacion entre e crecemento economico y e bienestar general di nos ciudadanonan. Esey ta encera un bon cuido medico cu un hospital di cinco strea cu ta cumpli cu e necesidadnan na e nivel cu nos kier cumpli cu ne pa nos pais. E proyecto aki ta un ambicion y un vision. Pa por realisa e ambicion y e vision aki mester traha hunto den un comunidad. Mi ta masha orguyoso cu e vision aki por conta cu cooperacion di institutonan renombra den nos pais. Institutonan cu tin e capacidad pa por carga e ehecucion di un vision asina. Esaki ta pone cu como Arubiano nos por bisa cu enberdad nos tin un vision grandi, pero nos tin hende tambe cu por carga y ehecuta e vision aki y cu tin e compromiso pa hiba Aruba riba un siguiente nivel”.

  Eman a recorda esnan presente cu Aruba a crece di un isla di 200 mil bishitante pa aña pa 1 miyon y mey di turista na e momentonan aki. Motibo pakico mester a traha riba un hospital cu por brinda servicio na e Aruba di awe. Mester busca e balans entre crecemento economico y bienestar di e comunidad. Aruba ta buscando pa ta un isla di 5 strea pa medio di vision y e plan BoAruba cu ta inclui un Cuido Medico di 5 strea. E proyecto dinamico aki ta duna Aruba un dimension regional y respet internacional pa haci di e isla aki un destino medico. Prome Minister tabatin palabra di elogio pa tur envolvi den e proyecto y e proceso aki.

Leave a Reply