Home General “Restauracion di edificio den Zoutmanstraat lo debolbe su balor monumental”

“Restauracion di edificio den Zoutmanstraat lo debolbe su balor monumental”

0
0
SHARE
- Advertisement -

Ir. Jouel Croes di CAST N.V.

ORANJESTAD   (AAN): Renobacion di e edificio den Zoutmanstraat ta mas un restauracion cu un renobacion. E intencion principal su tras ta no solamente di rescata un edificio historico y dun’e un funcion practico den comunidad, pero tambe di pon’e den su estado original. Mester accentua e balor monumental di e edificio historico aki.

    Oficina Croes Architecture Studio N.V. of CAST N.V. a haya e tarea di restauracion aki for di 2010 caba y e tempo ey a cuminsa haci e estudionan necesario.

Ir. Jouel Croes, como di dos generacion di profesional den e ramo y esun directamente encarga cu e proyecto,  a comenta cu normalmente ta haya djis un of dos potret di un edificio bieu asina. “Pero pa nos suerte nos a haya hopi potret y por a mira con den cada epoca tabata haci cambionan grandi na e edificio.”

        El a indica cu loke a hala nan atencion basta tabata e hecho di con moderno e structura a bira den decada 70. Den e plannan di su restauracion cual contract ya a wordo firma e siman aki dor di Ministernan di Gabinete Mike Eman, Fondo Desaroyo Aruba y contratista Van Den Broek Holding N.V., ta inclui algun caracteristica masha interesante. Por ehempel e panchinan di dak cu lo uza den e restauracion no ta nobo. T

     a bay uza e panchinan cu a kita for di dak di edificio di Corte y cu tur e tempo aki tabata warda na sede di DOW. E panchinan aki ta yama ‘kruispannen’. E vloer di e edificio lo ta full di palo y pa trece e dos trapinan bek den su estado original, ta bay haci uzo di ‘hardhout’. Diferente na otro monumentonan riba e isla, manera Museo Historico y Censo, e edificio aki no ta bay haya un parti adicional den diseño moderno.

    Solamente un oficina ta bay haya airco mientras cu e otronan tur lo keda cu ventilacion natural teniendo na cuenta e funcion cu e edificio ta destina pa haya como sede di artesanonan y produccion cu lo tuma luga eyden.

     Na e di dos piso tin dos local chikito cu muraya di glas translucent (cu no por wak dor di dje) pa asina dun’e un similaridad cu e otro edificionan riba Plasa Padu. Durante e conferencia di prensa ofreci na ocasion di firmamento di contract, Prome Minister Mike Eman a expresa su confianza den Ir. Croes.

     “Nos tin bon experiencia cu nan capacidad.” Algun di e proyectonan cu e oficina aki a yega di traha riba dje recientemente ta renobacion di Costa Linda Beach Resort y fachada di Penha den caya principal. Otro proyecto pa pais Aruba cu Croes tin na su encargo y ta bayendo hopi bon, ta e Facilidad Multi-funcional di Paradera. Pa e arkitecto Arubiano hoben aki, e restauracion di e edificio na Zoutmanstraat ta un responsabilidad grandi, pero no intimidante dor di e hecho cu tanto e como su tata tin experiencia amplio den e specialidad aki di arkitectura. Jouel su afstrudeerpoject na TU Delft tabata hustamente e restauracion di un edificio di siglo 14.

     Fuera di esey, tata y yiu a participa den e restauracion di Kerki Protestant na Piedra Plat, Misa di San Nicolas, San Francisco na Playa y tambe Santa Anna na Noord. “Pa mi ta un honor hopi grandi. E ta un di e edificionan di mas bieu di Aruba. E prome piedra a wordo poni na 1911. Nos ta hopi contento di a wordo invita dor di Gobierno di Aruba pa participa den e destaho publico y cu nos a cumpli cu tur e exigencianan,” Ir. Jouel Croes a bisa. Tur e trabounan cuidadoso aki pa e preservacion di loke ta den bon condicion y restauracion loke ta necesario ta bay a base di un cooperacion estrecho entre Monumentenbureau, e oficina di arkitecto y e compania di construccion. Ta premira cu e trabounan lo dura mas o menos un aña.

- Advertisement -

DUNA COMENTARIO

Please enter your comment!
Please enter your name here