Home Editorial Editorial: BAN PAPIA E BERDAD!

Editorial: BAN PAPIA E BERDAD!

4
0
SHARE
- Advertisement -

         Cu mi no ta di acuerdo cu algun di e prioridadnan estableci te awor ta un hecho irefutable, pero mi ta spera cu ningun hende a confundi e aspecto ey di Gobierno cu e otro proyectonan cu el a realiza y e rumbo riba cual el a pone Aruba. Si tuma solamente turismo como ehemplo, mi ta sigur cu tur hende honesto ta di acuerdo cu nunca antes ningun Gobierno a haci loke esaki a haci, o sea amplia e horizontenan di nos prome pilar economico asina hopi den un tempo asina cortico. No ta cuestion cu ta Otmar a hacie, ta cuestion cu el a hacie na nomber di un Gobierno activo, eficaz, cu tin un lineamento su dilanti cu cual e ta cumpliendo cabalmente. Pone banda di dje e logronan di Visser, di Mike de Meza y di Mike Eman mes, y nos por bisa cu tur trankilidad cu ta bay ta dificil pa otro partido, cua cu e por ta den futuro,  supera o sikiera iguala e accionnan exitoso cumpli te awor pa e gobierno di turno.

Di un distanciamento criticable cu madre patria pa un acercamento y creacion di confianza asina grandi entre nos pais y Hulanda, no ta debi na nada otro cu e vision cu Mike Eman tin di loke Aruba mester ta y mester bira, y con el a bay su tras sin reserva. Lubida riba e tram y e klinkernan y e otro factornan di embeyecimento cu ta asina visible, y den hopi sentido criticable como prioridadnan, y ban concentra riba loke Hulanda ta pensa di nos Gobierno y cuanto admiracion a ser expresa te awor di nan parti pa e bon trabao cu el a bin ta ehecutando. Y den mi opinion, atrobe expresa cu e honestidad di un persona cu no tin pakico defende ningun politico, mi tin di admiti cu den Mike Eman Aruba tin un Prome Ministro digno di respet y admiracion.

Na Aruba bo ta haya politiconan di awa dushi manera Booshi y Lampe cu ta kere cu nan sa tur cos, pero cu no ta haci nada otro cu purba condena otro politiconan pa cosnan cu nan mes a practica den pasado. Un contradiccion cu solamente nan ta compronde y ni sikiera por splica satisfactoriamente. Mi conoce Mike Eman desde cu e tabata un chabalito hungando cu mi yiunan na Mon Plaisir, y semper a considere un persona honesto, sincero y di un gran balor moral. Ta e factornan aki, cu el a crece cu nan, a hacie grandi como Prome Ministro, y humano como politico cu ta fabrica tempo pa bishita hogarnan unda e no sa mes si e a bon bini of no, y distritonan unda e kier scucha di e proprio Pueblo kico su anhelonan ta. Bo por bisa cu tur libertad cu e accionnan personal ey di dje a kibra e barera cu tabata separa algun sector di nos Pueblo for di otro, y ta sirbiendo como un gom pa pega nan atrobe na otro. Nos ta den e proceso di crea un Pueblo uni, cu un meta comun importante su dilanti: esun di derota negativismo y pesimismo, y pone su fe den Dios y den un futuro promisor cu un Gobierno activo ta fabricando.

Nos tin problemanan di indole financiero cu mester ser supera, si Gobierno ta di logra su meta di crea e Aruba cu su vision tin pinta su dilanti. Pero, nos no por laga e tarea ey den man di Gobierno so; nos tambe mester participa pasobra e ta nos isla mescos cu di nan. Ta toca nos coopera pa derota e intelectualnan progresista cu kier impone un relativismo hipocrita y frivolo, cu kier convence nos cu tur cos ta igual, berdad mescos cu mentira, cu e victima bal menos cu e delincuente, y otro conceptonan mes eroneo di un izquierda descarila. E fabricacionnan aki di nunca a prospera na ningun otro parti di mundo, y nos tin e privilegio di mire mas di cerca cu otronan, djis tirando un bista pazuid di nos.

Mi kier a skirbi e editorial aki awe pa mi demostra publicamente mi confianza den Mike Eman y su ekipo di Gobierno; pa mi resalta loke mi conoce di dje como persona cu mi a mira crece cerca di mi cas, den union di su rumannan y mi yiunan, y pa mi confirma loke semper mi tabata sa di dje: su honestidad absoluto.

 

 

- Advertisement -

DUNA COMENTARIO

Please enter your comment!
Please enter your name here