Home Politica Masha tiki alumno a pasa test pa bay di school basico pa...

Masha tiki alumno a pasa test pa bay di school basico pa enseñanza secundario

1
0
SHARE
- Advertisement -

Fraccion di AVP lo investiga pakico:

ORANJESTAD (AAN) – Den conferencia di prensa di fraccion di AVP, e lider di fraccion drs. Rene Herde, a subraya cu un tema cu semper ta hopi importante ta enseñanza.

Drs. Herde a menciona cu e tema cu ta hopi den discusion den enseñanza, aworaki, ta e baymento di studiantenan pa Hulanda.

No obstante tin otro tema relaciona cu esaki, cu por ta diez biaha mas importante cu ta e seleccion di muchanan di enseñanza basico pa enseñanza secundario.

Drs. Rene Herde a subraya cu recientemente e seleccion aki a tuma lugar, y e consecuencianan a wordo discuti hopi. Un di e motibonan pa cual e tema ta wordo hopi discuti atrobe e aña aki, ta pasobra tin un cantidad di school cu tur aña ta participa unda e muchanan ta bay haci e test pa bay enseñanza secundario general y masha tiki a pasa esaki.

Drs. Rene Herde a menciona cu tin critica riba e school, e test, cu tin falta di informacion, tin duda cu e test tabata bon, tin pregunta si mester hacie di nobo, si e test ta  cumpli cu e meta di selecciona e muchanan segun nan capacidad of no.

Un di e criticanan cu por a scucha ta cu den e area pariba di brug tin un cantidad hopi menos cu normal cu a pasa e test.

Pabao di brug tin un cantidad hasta concentra den cierto schoolnan cu a pasa e test y otronan no.

Parlamentario drs. Rene Herde a subraya cu nos por puntra nos mes si ta e school a faya of e alumno mes, of si e test enberdad ta cumpli of no cu e meta.

El a subraya cu nan no kier duna un interpretacion sin cu tin tur e informacion. Nan kier asegura e maestronan di school, mayor y alumnonan cu fraccion di AVP ta bay haci su investigacion y a corto plazo lo informa comunidad riba e resultado.

Nan a cuminza haci pregunta y esnan oficial a bay pa Minister di Enseñanza pa nan haya sa kico e resultadonan tabata, ki splicacion tin, y con pa garantiza cu tur mucha tin e mesun oportunidad pa bay enseñanza secundario general si nan capacidad ta duna pa esaki.

E parlamentario lider di fraccion a menciona cu e sa cu e capacidad ta parti igual, pero si e seleccion ta mustra cu no tur mucha tin e mesun oportunidad pa yega enseñanza secundario, e ora ey tin un problema.

Nan no kier anticipa na esaki pero e pensamento di AVP semper tabata, ta y lo ta cu nan kier mesun oportunidad pa tur mucha, independiente di unda nan ta biba, nan estrato social, sexo, raza, of cualkier otro factor; enseñanza ta precisamente e instrumento pa eleva hende, pa duna e personanan e oportunidad di sali for di un situacion socio- economico por ta dificil. Oportunidad igual riba enseñanza ta esencial y AVP lo keda enfatiza riba dje.

- Advertisement -

DUNA COMENTARIO

Please enter your comment!
Please enter your name here