Home General A logra trece APA y STA na mesa y nan lo sigui...

A logra trece APA y STA na mesa y nan lo sigui na mesa buscando solucion

2
0
SHARE
- Advertisement -

ORANJESTAD (AAN) – Matutino DIARIO a acerca Mediador di Gobierno, señor Anselmo Pontilius, cu a wordo yama pa yuda den e conflicto cu tin entre gerencia y trahadornan di seguridad di Aruba Port Authority, representa pa STA.

Mediador sr. Pontilius a menciona cu na momento cu e sindicato a decreta e accion, automaticamente el a haya su mes yama na interveni, pasobra esaki ta tarea di Mediador di Gobierno y ley ta dune e oportunidad aki tambe y sigur den caso di conflicto den companianan importante di gobierno manera APA, ELMAR, etc.

Den e caso aki tambe tur dos partido a mustra interes pa Mediador interveni, esta STA, Gerencia, Minister di Labor y Minister di Finanzanan.

Señor Pontilius a duna di conoce cu pa merdia caba ya nan por a bay mesa y gerencia a mustra su preocupacion pa forma con e situacion a surgi.

E momento ey ya tur trahador lo a bay traha, pero Mediador a indica cu mester busca un manera pa evita esaki y percura pa tin un salida hopi cla. Esaki pasobra evidentemente instancianan manera Aeropuerto y waf tin su exigencianan internacional y sigur nos pais tin cu cumpli cu nan.

Durante e reunion tabata tin un debate pa wak con pa haya un salida y evita locual a sosode. Mediador a traha riba algun sugerencianan cu ta bay wordo presenta diahuebs awor pa 10’ or di mainta, y ta bay mira si por firma un protocol cu ta recomendacionnan concreto.

Mediador Anselmo Pontilius a señala cu ta evidente cu tanto STA como Gerencia di APA tin un responsabilidad grandi pa preveni situacionnan asina aki.

E Mediador no ta mira cu tin un conflicto unda cu e trahadornan di seguridad na waf ta wordo perhudica. E gerencia a mustra cu nan tin cu cumpli cu cierto cantidad di personal na warda, y a prueba cu tin un cantidad di trahador cu na dado momento ta malo (AO) y APA na su turno, ya na comienzo di aña caba, a bay busca un cierto cantidad di trahadornan mas y ya caba tabata tin discusion riba esaki cerca Mediador di gobierno, y el a recomenda nan pa bin hunto locual nan a haci tambe.

Tanto gerencia di APA como e sindicato a reuni cu tur e trahadornan di e departamento di seguridad. No obstante, segun Mediador señor Pontilius, ta logico cu tin un preocupacion bao di e trahadornan cu tabata tey caba, cu ta puntra con hopi experiencia y conocimento esnan nobo cu ta bin di otro compania tin, riba e trabao pa cual nan si a sigui curso, preparacion y ta califica pa haci e trabao aki.

Pero riba su mes no tin un debate legal si APA a viola e contrato colectivo of no. El a agrega cu e dunador di trabao tin e autoridad pa busca hende pa e trabao tanten cu nan ta califica pa cumpli cu e trabao, y e dunador di trabao tambe tin obligacion di cumpli cu e reglanan y ley internacional cu mester tin cierto cantidad di hende den cada post, y esaki ta e discusion cu tabata tin.

Tin diferencianan di opinion tocante si mester tuma hende vast of no, y den esaki tin discusion, pero no tin conflicto di caracter legal of violacion di CAO.

Ningun trahador a wordo perhudica na entrada, mas bien a wordo constata cu tin trahador cu a traha di mas na overtime, y mester tene cuenta cu tin ley di overtime y mester cuida e trahador su salud na prome lugar. Den e caso aki pa motibo di e falta di personal, tin trahadornan cu a traha mas cu 16 ora na overtime. E aspecto aki a wordo trata hopi amplio dialuna, y Mediador Pontilius ta convenci cu despues di loke a sosode tin un claridad total na unda nan kier bay, y cu si pone demasiado hende na trabao cu despues mester kita nan, ta algo cu gerencia di APA como e otro compania mester purba di evita. E no ta kere cu ta bay tin mas accion y cu tur dos partido a realiza cu ta na mesa mester resolve e situacion aki, ya cu den e caso aki no tin ganador y ta importante pa dos partido cu tin un contrato colectivo asina bon manera APA y STA mester keda na mesa. Un sugerencia di e Mediador ta pa keda monitor e situacion cada luna si tin suficiente hende na pia di trabao y si no con ta soluciona esaki.

 

- Advertisement -

DUNA COMENTARIO

Please enter your comment!
Please enter your name here