Home Politica Analisis politico

Analisis politico

2
0
SHARE
- Advertisement -

Coalicion MEP y Booshi

Ya pa basta luna nos ta tende Evelyne splica mundo cu e ta papiando cu yiu di Nel Oduber pa bin ariba lista di MEP pero te awe sin resultado concreto. Ariba su mes lo mester ta asina cu e candidatura di un yiu di Nel no mag ta un problema cu ta tuma tanto tempo. Esaki ta asina pa esnan  cu no conoce e  background di tur e tardamento.

E background tin dos parti importante. E prome ta e posibel regreso den MEP di Booshi Wever y e di dos ta e posicion di e yiu di Nel ariba lista. Regreso di Booshi ariba lista di MEP pa Nel ta un problema serio. Un paar di siman pasa Evelyne a anuncia cu Booshi lo bin back ariba lista di MEP cu a haci Nel su fuse bula.

Bao di  ningun circumstancia Nel kier Booshi den MEP atrobe. Nel a saca Booshi for di partido despues cu Booshi a reda e deal cu e tabatin cu Nel encuanto sacamento di Marisol for di MEP. Comprendibel naturalmente pasobra e acuerdo cu tabatin entre Nel y Booshi pa saca Marisol for di partido ta un di actonan mas bergonzoso cu a yega di tuma luga den politica na Aruba.

Ora Nel a tende di e plan di Evelyne pa hala Booshi back den MEP Nel a rementa y a menaza cu si Booshi drenta MEP Nel y su yiu ta afo. Atrobe un di e blundernan di Evelyne di anuncia regreso di Booshi prome cu tur cos tabata regla. Esey ta e problema cu tin awo.

E doñonan di MEP ta dilanti e dilemma. Yiu di Nel lo pone Nel campaña pa su yiu ariba lista di MEP y esaki ta significa un cierto cantidad di voto. Cuanto ningun hende sa pero suficiente pa ta un problema hopi serio pa MEP.

E otro banda ta cu Booshi sigur tin un cantidad di voto cu si Booshi no bay ariba lista di MEP e votonan aki ta perdi pa MEP y por ta cu ta trata di un rest zetel pa MEP. Awo como ta trata di problema di MEP e no ta un problema di principio pero di capricho personal di hende cu tabata den MEP hunto pa hopi aña y nan no tabata hunto a base di programa, ideal, ideologia of hasta di amistad.

Nan tabata hunto “brothers in crime” solamente pa sirbi nan propio interes. Pesey nan solucion ta bay ta aunke nan ta tene scondi te awo cu no ta Booshi ta bay ariba lista si MEP pero e partido cu Booshi a caba di lanta ta bay cera un acuerdo di coalicion cu MEP y di e manera aki no ta Booshi ta bay ariba lista di MEP pero su partido a cera un coalicion cu MEP  y e candidato di e partido di MEP ta Booshi.

Dificil pa Nel guli pero sigur no imposibel mirando nan pasado. E ora e di dos aspecto ta bin dilanti. Booshi ya caba tin un cierto cantidad di voto y e yiu di Nel nada ainda cu por hustifica su luga ariba lista. Nel den ultimo eleccion tabatin mas cu 6000 voto pero no ta conoci cuanto di nan en berdad lo  keda MEP. Booshi ta un politico di hopi aña cu ta sigur di un minimo di voto cu MEP mester pa no cay completamente.

E hecho cu ta trata aki di hendenan cu a mustra den pasado cu nan no ta worde  molestia door di principio nan ta bay haya otro y pa pueblo e ta bay ta interesante con nan ta bay dorna nan acuerdo di coalicion prome cu eleccion cu tur esaki ta sosode pa sirbi e interes di nos pais.

Nos ta sigur cu tanto e doñonan di MEP como Nel ta conciente cu e drama di MEP kizas ta mas grandi cu  nan mes ta pensa y cu nan mester di e ultimo voto cu nan por haya y no por ta asina cu nan capricho kens ta bay causa mas caida cu ya nan ta aden. E unico pregunta cu ta keda ta con nan ta bay bende e plan diabolico aki na pueblo.

- Advertisement -

DUNA COMENTARIO

Please enter your comment!
Please enter your name here