Na luna di mei por a nota un cantidad grandi di comerciante, dignatario y embahadornan na Aruba for di Europa y Latino America pa participa na e magno evento intrnacional ‘Europe Meets the Americas’.
E conferencia aki a trece delegacion y misionnan comercial for di e dos continentenan aki hunto, pa crea posibilidadnan pa cada uno di e delegacionnan aki cu otro: e prome paso pa un Aruba como ‘Hub Comercial’ entre Europa y Latino America.
E dos continentenan aki tin hopi pa ofrece otro, pero e distancia y diferencianan cultural ta haci e posibilidadnan un poco complica. Aruba, un isla cu afinidad pa cada uno di e continentenan aki, ta mira su mes como un intermediador entre e dos cont inentenan. Ex-minister di Asuntonan Economico Hulandes, Prof. mr. Laurens Jan Brinkhorst ta splica “Gabinete Mike Eman ta riba e caminda corecto.
Reino ta consisti di mas cos cu solamente lazonan historico pero cu den actualidad e tin un balor agrega grandi cu por papia di un ‘win-win situation’. Aruba ta mira con e crisis ta asota Europa y con di otro banda paisnan Sur Americano ta desaroyando positivamente pa despues ofrece nan mes como ‘draaischijf ’ entre ambos continente. Tur hende ta ambiciona esey naturalmente, pero e cuestion ta keda ta con resalta bo aspectonan unico.
Aruba ta haci esey dor di mustra claramente kico e balor agrega ta. Dor di a organisa e conferencia di ‘Europe meets the Americas’, Aruba ta duna forma concreto na e funcion di ‘draaischijf’ dor di haci cu empresanan di Europa y Sur America por a topa cu otro.”
MKB Nederland, un organisacion di empresanan mediano y chikito den henter Hulanda, tabatin hopi intereses den e conferencia ‘Europe meets the Americas.’ E efecto di Aruba durante un mision comercial na Brazil di Reino Hulandes, den cua Aruba tambe tabata forma parti, presidente di MKB Nederland a splica di tabata testigo di e calidadnan Arubiano hopi particular. “Un par di CEO’s di empresanan Hulandes, durante e mission comercial na Brazil tabata den un combersacion cu Petrobras, un di e companianan petrolero mas grandi na mundo. Nunca antes nan a yega di wordo ricibi riba un nivel asina halto.
Prome Minister di Aruba Mike Eman tambe a forma parti di e delegacion. El a habri e combersacion den e idioma Portugues cu e hendenan di Petrobras y mesora a duna direccion na e ambiente. E balor di esaki no por wordo midi den placa. Ta impagabel si bo por drenta di e forma aki den un mision. Esaki ta mustra unda nos oportunidadnan comun ta”. Presidente di MKBNederland
Hans Biesheuvel ta mira den Aruba un partner pa e mundo empresarial di Hulanda cu kier subi mercadonan creciente den Latino America. E empresnaan cu a bin Aruba den e delegacion di MKB na luna di mei ta interesa pa establece nan mes aki pa for di Aruba haci negoshi cu companianan den Latino America y America Central. E motibonan ta obvio. E Arubiano conoce e idioma, e cultura di nos bisiñanan y Aruba tin un posicion geografico ideal pa e meta aki.
Hans Biesheuvel ta parti di e delegacion comercial di Prome Minister Hulandes Rutte kende ta na Aruba actualmente. “Mi ta haya fantastico di ta aki un bes mas”, Biesheuvel a bisa. “Ora mi ta aki mi ta haya energia positivo”. E conferencia di EMA tabata uno super exitoso. Empresanan Hulandes tabata sumamente positivo y inspira pa e ambiente y e bon organisacion di e conferencia.
E oportunidadnan cu a wordo presenta a cay den masha bon tera cerca nan. Nos ta bezig ta wak awor con sigui traha riba e oportunidadnan aki. Tur esaki den cooperacion cu Aruba den un partnership completo”. Biesheuvel a bisa di a papia caba cu ATIA y diadomingo atardi y dialuna mainta e delegacion comercial ta sinta cu mundo comercial di Aruba.
“E ora nos lo discuti con duna e cooperacion aki structura. No pa esaki keda na un bishita de bes en cuando, pero tau no di un contacto continuo”. E hecho cu presidente di MKB ta na Aruba un bes mas den un periodo asina cortico no ta por nada. E ta kere den Aruba y loke e isla aki tin di ofrece. “Mi a topa cu Prome Minister Eman na Hulanda na unda nos a papia ampliamente. Cosnan ta canando bon.
MKB tabata na luna di mei na e conferencia di EMA cu mas o menos 15 empresa Hulandes y awe tin na Aruba 7 empresa grandi aki den e delegacion. Pronto nos ta bin cu e desk digital yama ‘MKB service desk’. Un di e websitenan mas bishita na Hulanda. Nos ta habri un portal pa Aruba. Djis dor di click riba dje bo por mira kico e oportunidnan na Aruba ta y cerca ken bo mester ta pa haya informacion adicional si bo kier haci negoshi aki. E porta pa Aruba ta wordo habri mas y mas hancho”.
Aruba su posicion den Reino awendia ta uno ehemplar y di l iderazgo. Contrar io na e situacion di antes, Aruba a bira e “frontrunner” den Reino Hulandes pa loke ta trata cooperacion y duna contenido na Reino Hulandes. Cu Aruba por fungi como un hub economico entre e dos continentenan ta debi parcialmente tambe na e siguridad cu Reino Hulandes ta trece cu ne riba varios nivel. ‘
Huridicamente y politicamente, Aruba ta un pais stabil caminda cu cualkier inversionista internacional por ta sigur di su inversionnan y di e isla como un ‘Hub Comercial’. Aruba ta drentando un fase nobo den su desaroyo como pais for di 1986. Economia internacional ta cambia y Aruba su economia mester adapta su mes. Gabinete Mike Eman a realisa esaki y a haci e inversionnan necesario pa Aruba por ta un pais prepara pa e retonan grandi cu futuro ta trece cu ne.
Aruba ta inverti den su infrastructura, den sostenibilidad y su hendenan. E product Aruba ta hayando forma y importancia grandi pa turismo y awor tambe pa e posicion nobo como hub comercial entre dos economia continental di hopi importancia mundial.
