Home General Casi 69 mil persona por vota dia 27 di september awor

Casi 69 mil persona por vota dia 27 di september awor

1
0
SHARE
- Advertisement -

ORANJESTAD   (AAN):   Den un encuentro cu Prensa, Presidente di Conseho Electoral Hubert Maduro, a duna un splicacion riba e proceso electoral cu Aruba ta pasando pa e eleccion parlamentario di 27 di september, 2013.

E trabou pa e eleccion parlamentario 2013 ta algo cu ta andando basta tempo caba y inclusive personal a wordo prepara caba.

Segun Maduro a splica, nan lo tin material nobo, printer nobo, mashin nobo pa corta e carchinan di voto cu e ciudadano ta haya na su cas. Pero tambe e tabatin elogio pa e proceso cu Bevolkingsbureau a haci e ultimo cuatro añanan.

“Den e ultimo cuatro añanan Bevolkingsbureau a haci un trabou masha grandi mes pa sanea e database (cu ta referi na tur esnan cu ta biba na Aruba, kitando esnan cu a fayece). Nos tin un registro di poblacion di Aruba cu ta hopi mas miho di loke e tabata cuatro aña pasa. E resultado tambe lo ta cu e lista di votador lo no tin tanto eror manera cu e tabatin ultimo biaha.”

Basa riba e ahustenan haci den sistema, por bisa cu te cu e fecha a cera pa inscribi como habitante di Aruba, esaki tabata 68.755 persona cu por vota. E ta inclui personanan cu ta haci aña despues di e fecha di registro a cera. Pues e software a tene cuenta cu tur persona cu tin 18 aña riba dia di eleccion. E por bisa cu e poblacion a crece un poco, compara cu cuatro aña pasa.

Pa calcula cuanto voto mester pa un asiento, esaki ta depende di e cantidad di votonan valido deposita. Pues no por calcule awor basa riba e cantidad di hendenan cu por vota. Con e restzetelnan ta wordo reparti, ta wordo regla via un formula cu ta splica den ley.

Maduro a bisa tambe cu biaha pasa no tabatin problema den conteo di voto. Solamente di un distrito tabatin un reconteo y esaki tabata pa motibo cu e relato oficial di e urna, no tabata corecto. Pero na final e cifranan tabata cuadra. Semper ta purba pa riba e mesun anochi di eleccion wak cu e relatonan di e conteo ta corecto. Pero basicamente no tin reconteo di voto.

“Nos na Aruba conoce un democracia cu ta ancra den e urna electoral. E hendenan cu ta sinta na e urna, ta haci e funcion importante di haci e conteo. Mester tin un motibo basta serio pa haci un reconteo. Ta solamente ora cu no entrega un relato oficial, ta conta bek,” Maduro a indica.

E seleccion di kendenan ta sinta na e urnanan ta wordo haci door di Bevolkingsbureau y den esaki partidonan tin un rol importante, poniendo nan Watchdog, pero den e sistema di Aruba for di cuminsamento te awor, nan ta percura cu tin hende pa sinta na e urnanan. E ta algo na interes general. Den e ultimo eleccion, den reunion cu esnan escogi, Maduro a keda sorprendi pa e cantidad di personanan hoben cu a duna nomber pa yuda activamente den e proceso aki.

 

- Advertisement -

DUNA COMENTARIO

Please enter your comment!
Please enter your name here