Evelyn Croes lider di MEP:
ORANJESTAD (AAN): Evelyn Croes lider di MEP durante reunion publico riba reparatie toeslag a splica cu espacio pa haci mucho cambio den e ley aki no tin e momentonan aki.
E ley ta pa pensionadonan haya mas placa for di gobierno y ta un acuerdo cu gobierno mes a presenta debi na acuerdonan di dialogo social.
E lider di MEP a duna su comentario general riba e puntonan. Tin un aumento drastico ultimo temponan aki riba productonan di necesidad. Awendia cu 100 florin ta poco cos bo ta haya. Ultimo tres pa cuater aña e poder di compra a bai atras basta pisa.
Hopi hende ta biba bou di nan entrada y desempleo ta basta entre nos hendenan cu un economia stagna segun Evelyn Croes. E unico cifra publica di 2009 ta mira hopi cos. E cifranan di CBS presenta ta mucho duro pa papia riba dje y gobierno ta purba sconde esakinan tambe.
Tin un grupo hopi neglisha. E cambio di reparatie toeslag ta bon paso pero no ta suficiente pa e pensionadonan. Financieramente mester duna atencion na e hendenan cu ta den necesidad segun Evelyn Croes. Esnan cu ta traha cu nos grandinan merece elogio. E trabou ta pisa fisicamente y mentalmente.
Evelyn Croes di MEP a splica cu nan ta kere cu mester stop solamente den cas di cuido pero mester subsidia cuido na cas. Kier pa e cuido na cas sigui. Tanten cu no por eleva e calidad di cuido na cas di nos grandinan no mester keda pusha mas hende den e caso di cuido segun lider di MEP. Tambe a papia riba e aspecto financiero y sistema di belasting. Esnan mas vulnerable den comunidad lo sinti e efecto di loke MEP ta propone.
Evelyn Croes lider di MEP sa di e dolornan cu ta biba bou di e pensionadonan. Coleganan den parlamento tambe sa di e problema cu pensionadonan ta pasa aden. Un prome minister cu conoce e dolor di e pensionado y ta sinta keto sin manda e ley parlamento no ta sincero…MEP si por trece e cambio segun e lider.
Otro paisnan ta separa e cuido di salud di nos grandinan for di e cuido general. Evelyn Croes lider di MEP a splica cu tin un descriminacion den e cuido di salud di nos hendenan. Tin algun cos cu MEP kier claridad riba dje. Pa ta mas envolvi den tareanan mester tin nos grandinan tambe cu nan consehonan segun lider di MEP.
