Home General FDA a duna impulso grandi na economia di Aruba

FDA a duna impulso grandi na economia di Aruba

1
0
SHARE
- Advertisement -

ORANJESTAD     (AAN): Durante entrega di e relato anual di Fondo Desaroyo Aruba (FDA), Prome Minister Mike Eman a expresa cu su Gabinete ta “hopi orguyoso di e instituto y sigur kier pa e sigui  den su funcion”. Esaki tabata como reaccion riba peticion di miembro di FDA, Frendsel Giel (Director di AIB) cu  FDA mester sigui existi.

Na e ceremonia cu a tuma luga diaranson mainta den Oficina di Prome Minister Eman tabata presente tambe Minister di Integracion Infrastructura y Medio Ambiente Benny Sevinger y demas miembronan di directiva di FDA, dr. Glenn Thode y sra. Jessy Simon.

Mirando tur e trabou cu e fundacion a haci principalmente e ultimo dos añanan, financiando un cantidad grandi di proyecto, sr.Giel a bisa cu e fundacion mester sigui existi pasobra e ta haciendo un bon trabou y ta cumpliendo pa financia proyectonan importante, pero alabes hincando miyones den e economia local.

Na fin di 2015 FDA ta stop di existi den su forma actual. Intencion di gobierno ta pa continua cu e concepto di FDA den un concepto nobo pa por garantiza no solamente inversionnan den diferente areanan di desaroyo importante pa Aruba pero tambe pa percura cu e inversionnan aki ta wordo ehecuta cu proceduranan transparente y corecto y duna cuenta na un manera apriopia di e inversionnan haci.

Eman: “Nos a informa Gobierno di Hulanda cu nos kier pa FDA, cu ta maneha e fondo cu a haci gran parti di e inversionnan na Aruba, continua. Pero tambe Gobierno lo busca forma pa anualmente aloca fondonan pa laga FDA maneha nan. Gobierno di Hulanda a expresa di lo evalua ki rol e por hunga despues cu e ultimo parti di loke nan a pone den e fondo, wordo inverti. “Di tur manera, Hulanda ta mira positivamente cu Aruba kier pa tipo di institutonan asina tin tur e “checks and balances”. Esey ta hopi importante”, Eman a bisa.

Mas aleu Eman a expresa cu Gobierno ta hopi orguyoso di e rol cu FDA a hunga den recuperacion economico di pais Aruba. Principalmente den e periodo desde cu su Gabinete a asumi gobernacion di Aruba na 2009. E momento ey, a constata cu tabatin basta placa destina pa proyectonan cu lo a crea actividad economico riba e pais y lo a yuda pa drecha e deterioro cu Gobierno a constata den scolnan, barionan pero tambe den centro di ciudad.

“Pesey e tempo ey nos a dicidi di drenta den un dialogo cu Hulanda pa realoca e fondonan aki, cu por a haci inversion den renobacion di scolnan, centronan di ciudad y barionan. Hulanda a coopera y awe tur hende por mira rond Aruba cu e proyectonan ta canando,” Prome Minister Eman yen di orguyo a comenta.

Tambe e mandatario a informa e directiva cu FDA den Reino ta sirbi como ehempel. “Hopi bes nan ta puntrami si por splica otro paisnan den Reino con nos a institui FDA y con FDA a yuda maneha fondonan grandi di inversion na Aruba. Cu orguyo mi ta splica nan con FDA a wordo funda.” Hunto cu colega Sevinger, Eman a felicita FDA y su miembronan pa a percura cu e fondonan a wordo bon aloca y controla ora di haci inversionnan, cumpliendo asina cu e meta proponi ora cu FDA a wordo lanta.

 

- Advertisement -

DUNA COMENTARIO

Please enter your comment!
Please enter your name here