Segun parlamentario Arondino Croes:
ORANJESTAD (AAN) – Parlamentario Arondino Croes den dos ocasion a capta atencion, esun prome pasobra el a bin cu un pida asbesto den Corte y aworaki el a bin Parlamento cu pida clinkers.
Den entrevista cu Matutino DIARIO, el a menciona cu partido MEP enfaticamente a bisa cu nan ta pro desaroyo y cu embeyecimento di ciudad tambe ta importante, sea pone clinkers of asfalt.
Pero nan ta haya cu no por move e prioridadnan manera e construccion di un school HAVO na Noord unda cu aworaki tin 200 hoben cu no por haya school, pa hinca placa den tram y embeyecimento di ciudad.
El a bin cu e clinkers pa mustra gobierno cu no por come clinkers, y cu e pueblo tin mester di trabao y no solamente laga e clinkers como un parti chikito di e totalidad di desaroyo sostenible.
Na momento cu a indica na e parlamentario di MEP cu pueblo mes ta pidi pa clinkers, asfalt y iluminacion, den nan camindanan publico, y cu esaki tanto gobierno como director di DOW a constata, señor Arondino Croes a menciona cu MEP tambe ta drentando den barionan y logicamente bibando den e pais aki nos kier wak desaroyo, si no tin asfalt nan kier esaki, si no tin luz nan ta pidie, pero esaki ta gewoon un parti di e problematica completo, pasobra ora di bay riba e aspectonan social y desempleo, y cu e poder di compra a baha tambe e hendenan ta expresa na MEP y AVP mester papia riba e aspectonan aki tambe.
Parlamentario Arondino Croes a señala cu no por embeyece un area mientras tin 700 mucha cu no tin pan pa bay school, y MEP ta kere cu mester pone e desaroyo den balansa.
El a agrega cu sin pan riba mesa, sin trabao, tanto bal tin desaroyo pafo pero e famia no por paga awa ni coriente. El a subraya cu e finanzanan publico no ta duna tampoco, pasobra e debe publico ta di cinco miyon florin y mester bolbe fia placa y e ta haya cu mester informa nos pueblo bon y no mester laga e desaroyo social atras sin cu por aumenta salario minimo ni hisa bijstand, cu ta prioridadnan cu mester pone hunto den balansa.
