Home General Lo entrega di buki di Turismo na scolnan basico y secundario di...

Lo entrega di buki di Turismo na scolnan basico y secundario di Aruba publico

1
0
SHARE
- Advertisement -

ORANJESTAD    (AAN):    Minister di Turismo, Transporte y Labor Otmar Oduber ta introduci un proyecto unico, unda cu lo haci entrega di e buki di autor Sr. Rory Arends “Turismo Ayera, Awe y Mayan”, na diferente scolnan basico, secundario y scolnan publico pa educa nos hobennan riba turismo,  e pilar economico di nos pais.

E mandatario ta indica cu parti di e tareanan di e Fondo di Mehoracion di Producto Aruba (TPEF) ta encera tambe, un aspecto cu tin di haber cu e concientisacion di nos comunidad y mira con por mehora ainda mas e conocemento di nos hobennan pa loke ta sector di turismo.  Idea ta pa lanta e interes di nos futuro generacion pa conoce poco mas di e sector aki.

“Esaki ta un programa cu nos tabatin den e ultimo cuatro añanan y sigur un enfoke pa e proximo añanan, ta uno unda cu nos kier bay conversa cu e Minister di Enseñansa y cu Departamento di Enseñansa pa por sigura den e añanan nos dilanti cu nos turismo lo bira parti di e curriculum na scolnan”, Minister Otmar Oduber a duna di conoce.

Di e forma ey por duna educacion  e base di cual ta e criterianan di kico nos economia ta depende asina hopi di dje; con nos a lanta y fomenta turismo como e pilar economico di Aruba y e importancia cu esaki tin pa futuro tambe.

Den e cuadro aki, e mandatario a indica cu tin un direccion cu ta conduci na loke mester wordo haci e proximo cuatro añanan, conhuntamente cu e Fondo di Mehoracion di Producto Aruba.

Despues di a conversa cu diferente personanan riba e material aki a dicidi pa acerca SKOA, di cual den e proximo simannan aki lo bay haci entrega di un cantidad di bukinan skirbi pa un baluarte di Turismo na Aruba.

E buki aki yama Turismo Ayera, Awe y Mayan, skirbi pa Sr. Rory Arends cu ta un voz di experiencia y su legado. E buki ta aki ta papia di kico nos Turismo tabata significa antes, kico e ta significa awe y kico e lo significa pa nos den futuro.

Motibo pakico a opta pa e buki aki ta pa fuera di ta un autor y un persona cu un trayectoria larguisimo den e mundo di turismo, Sr. Rory Arends ta tambe un pionero cu a wordo reconoci tempo cu a celebra e 50 añanan di turismo y e 50 añanan di e prome hotel aki nan na Aruba.

Rory Arends ta ex-director di oficina di Turismo, tambe e tabata CEO di AHATA y awe ta den e Conseho di Consultativo di Turismo unda cu ta delibera riba diferente puntonan importante pa loke ta trata nos turismo. E contenido di e buki aki lo sa di haci un papel den nos scolnan pa asina aki yuda amplia conocemento di nos hobennan riba turismo.

Manera a acorda cu SKOA, e lo wordo distribui na e diferente scolnan basico y secundario cu ta resorta bou di nan, como tambe na e scolnan publico riba nos isla.

Ta desea tambe pa e buki aki drenta nos enseñansa y wordo usa como un di e basenan riba cual lo introduci poco poco turismo den nos scolnan. Igualmente, lo cuminsa cana e caminda pa prepara y cuminsa e proceso pa por inclui esaki den curiculum di nos scolnan pa asina aki nos hobennan por aprecia y admira loke awe ta e pilar economico di nos pais.

 

- Advertisement -

DUNA COMENTARIO

Please enter your comment!
Please enter your name here