Home General MOU entre ARINA y MKB-Nederland lo traduci den mas negoshi pa Aruba...

MOU entre ARINA y MKB-Nederland lo traduci den mas negoshi pa Aruba Como “follow up” despues di Europe Meets the Americas

2
0
SHARE
- Advertisement -

ORANJESTAD (AAN): “Nos ta masha contento di por a firma un MOU cu MKB-Nederland, pasobra cu esey awor nos lasonan lo ta mucho mas estrecho”, asina Michelle Hooyboer-Winklaar, Minister di Asuntonan Economico, Asuntonan Social y Cultura a duna di conoce despues di e evento di firmamento na Bestuurskantoor, den presencia di Minister Presidente Mark Rutte di Hulanda y Minister Presidente Mike Eman di Aruba.

E contactonan cu a worde fomenta durante “Europe Meets the Americas” na Aruba na luna di Mei ta hayando mas contenido cu e follow up debido di parti di Ministerio di Asuntonan Economico cu e diferente partnernan potencial. Den cuadro di cumpli cu su meta principal di brinda negoshinan chikito y mediano un bon apoyo y oportunidadnan pa crecemento y progreso, Minister di Asuntonan Economico, Social y Cultura, Michelle Hooyboer-Winklaar durante su bishita di trabao na Hulanda luna pasa a reuni cu Hans Biesheuvel, kende como presidente di MKB tabata na Aruba cu mas di 20 comerciante durante Europe Meets the Americas.

MKB ta e organizacion pa “midden en klein bedrijf” – negoshi mediano y chikito, cual ta traha na nan interes, desaroyo y progreso. Minister Hooyboer-Winklaar a splica cu e intencion ta pa bin un relacion estrecho entre ARINA (Aruba Investment Agency) y IDEA na Aruba, cu MKB na Hulanda. Esaki lo conduci positivamente na yega na mas oportunidad pa negoshinan chikito y mediano di Aruba por crece sea localmente of den exterior.

Ta bon pa enfatisa cu 99% di negoshinan Hulandes ta cay den e categoria di MKB, cu 5 pa 7 empleado y cu nan ta e motor di e economia. Tin hopi interes di parti di e segmento MKB pa crece pafo di Hulanda y Union Europeo y cu ta busca oportunidad den e islanan Hulandes, pero tambe na Latino America, pa cual nos isla lo por yuda reenforsa e proceso.

Na Aruba tin un situacion similar, unda cu e gran mayoria di negoshi ta chikito/mediano y Minister Hooyboer-Winklaar ta considera esakinan e “weso di lomba” di nos economia. Siguramente lo tin hopi beneficio pa Aruba den un bon relacion cu MKB, cual e mandatario ta trahando pa mantene y expande riba dje.

Palabracionnan y acuerdonan no mester keda simplemente algo riba papel, pero mester traha riba mantene e entusiasmo, energia y interes di e hendenan y negoshinan cu ta wak Aruba como partner strategico y sigui papia, sigui defini kico ta e siguiente pasonan concreto.

Cu e MOU firma na Aruba, por spera mas intercambio di informacion den forma activo entre MKB cu ARINA y IDEA. Cu esey e proceso pa atrae mas inversionista di Hulanda cu kier inverti na Aruba mes of den paisnan Latino Americano, pero via nos isla, awor lo cana den un forma mucho mas rapido.

 

- Advertisement -

DUNA COMENTARIO

Please enter your comment!
Please enter your name here