Home Politica Parlamentario Melvin Tromp ta reta Rudy Croes y su sobrina Evelyn

Parlamentario Melvin Tromp ta reta Rudy Croes y su sobrina Evelyn

3
0
SHARE
- Advertisement -

ORANJESTAD (AAN) – Parlamentario di AVP señor Melvin Tromp, a reacciona riba un discurso nacional di e lider di MEP señora Evelyn Wever-Croes.

Mervin Tromp a señala cu sra. Wever-Croes a haya ta bon pa den su discurso, cu el a yama nacional, pa bin cu atakenan, muy en particular, riba e maneho di Minister di Husticia y Enseñanza.

Fraccion di AVP a bin cu un contra reaccion, cu ta mustra cu tur e ponencianan riba e parti unda e ta papia di criminalidad no ta cuadra cu berdad.

Melvin a sinti pa trece esaki na claridad pa asina pueblo compronde cu esnan di MEP pa motibo di desesperacion ta trece argumentonan falso, pero incluso ta busca manera di chantahea y haci comosifuera trabaonan no ta wordo haci di parti di e minister di husticia. E parlamentario a indica cu fraccion di AVP a duna siguimento na e cooperacion riba tereno di husticia entre Antiyas, Hulanda y Aruba cu ta data for di aña 2004, unda a discuti, entre otro, e tema di radar cu e tempo ey minister di husticia, señor Rudy Croes, a crea un departamento cu ta carga e nomber di Warda Nos Costa, cu despues el a hinca den un bachi cu yama IASA.

E ta corda cu na inicio e departamento aki a confronta hopi problema pasobra mas bien e instancia aki a wordo crea pa hinca compinchenan di e minister ey como hefe, pero despues a bin resulta cu e mes a deshaci di nan.

No ta e minister di husticia actual a deshaci di e radarnan, Parlamentario Tromp a agrega, ni tampoco di Warda Nos Costa pa lanta IASA, ni ta e minister ni gobierno di AVP a bisa cu locual a wordo crea e ora ey a bay contra ley, ya cu Ministerio Publico mes a trek e minister Rudy Croes na su orea y mustre cu esey no por.

Nan tabata departamentonan cu no tabata tin ningun autorizacion pa actua, y esaki tambe a wordo mustra door di representantenan di gobierno di Hulanda.

Tromp a señala cu ex-minister Rudy Croes den un radio estacion a expresa, den fin di siman, cu e tabata cla hasta pa bay den pelea cu e Hulandesnan. Parlamentario Tromp a señala cu awor e por compronde pakico señor Watty Vos (q.e.p.d), tabata yame e tiger di papel pasobra ora e Hulandesnan yega para su dilanti, e persona aki tin e tendencia di perde tur su lana, pasobra esaki ta e forma con esnan di MEP ta busca forma di gaña pueblo.

Parlamentario Melvin Croes a expresa cu ex-minister Rudy Croes mester a actua na momento cu e mester a haci tal, y mustra e Hulandesnan cu e kier a bin cu un instrumento cu por a yuda combati criminalidad na Aruba.

Parlamentario Melvin Tromp a señala cu nan tin prueba cu Hulanda a kita e radar y tur cos for di e maneho di sr. Rudy Croes.

E parlamentario a reta señor Rudy Croes y su sobrina Evelyn pa mustra si loke AVP a publica den corant ta berdad of no, y si no ta berdad anto bin contradeci AVP cu e cosnan aki no ta cuadra.

- Advertisement -

DUNA COMENTARIO

Please enter your comment!
Please enter your name here