Home General Prome fase di Paradera Corridor a keda inaugura

Prome fase di Paradera Corridor a keda inaugura

1
0
SHARE
- Advertisement -

ORANJESTAD(AAN): E prome fase di Paradera Corridor a keda cla y entrega diahuebs mainta. Un proyecto cu Minister Otmar Oduber a hinca masha energia den dje, igual cu su colega Minister di Infrastructura Benny Sevinger. E prome fase ta cla y a worde inaugura cu hobennan plantando un cantidad di mata di fruta na elugar pa haci’e berde y dune un toke special.

Na mes momento gobierno a firma cu Thiel Corporation pa sigui cu e siguiente fase. Na e ocasion aki Prome Minister Mike Eman a hiba un discurso cortico. El a splica cu el a caba di sali di Montaña na unda el a bishita un baluarte di e bario, señora Johanna Figaroa-Tromp.

“Na momento cu a comparti cu ne y celebra tur loke el a nifica pa pais Aruba, el a braza mi y a pidi un bendicion pa mi. Un bendicion pa nos sigui cu e trabao cu nos ta haciendo pa pueblo y pais. El a pidi un bendicion pa mi, pero tambe pa henter e ekipo cu ta compaña mi den e trabao aki como Minister President di pais Aruba”.

“Orguyoso mi ta para aki nan awe dilanti un proyecto cu a worde carga door di dos minister di nos ekipo cu a duna tur di nan parti. Cu tur a trabaonan cu e tin den Infrastructura, colega Sevinger cumpliendo cu tur loke mester pa fisicamente por desaroya un proyecto asina ta para aki na un banda di mi y na mi otro banda Minister Otmar Oduber cu un compromiso special cu e bario di Paradera. Cu e bario di su raiz den cual el a traha e ultimo añanan y awe e ta aki pa demostra locual nos a anuncia e anochi cu nos a gana eleccion. Cu nos ta hopi consciente cu boso voto ta un voto y sosten di confianza presta.

Nos kier a demostra aki na Paradera cu nos ta traha pa e confianza ta mereci y pa e confianza ey continua”. Eman a sigui bisa cu e bendicion cu señora Johanna a pidi pa su persona y su ekipo ta pa nan por sigui cu e trabao aki den un compromiso pa cada un di esnan presente riba e rumbo pa trece felicidad den cada skina di Aruba. “Meta principal di nos gobernacion ta pa unda nos mira sufrimento nos trece alegria, unda nos mira scuridad trece claridad, unda nos mira falta di oportunidad habri portanan pa nos hendenan por progresa. Pesey awe e compromiso ta worde confirma cu logronan cu ta duna e confianza cu e trabao cu nos ta pone nos dilanti, hunto nos por haci’e”. Eman a termina su discurso cortico bisando ‘bon trabao Otmar, bon trabao Benny, ban sigui cu e bon trabao pasobra ainda falta’. Prome Minister a pidi un bendicion grandi di nos Creador pa inaugura e proyecto bunita di Paradera Corridor y sigui cu e trabao. “Sin e guia di nos Creador, sin su iluminacion poco por worde haci y nos ta sinti cu tur dia pueblo di Aruba ta den oracion pa nos por haya e guia y sabiduria pa haci e trabao”.

 

- Advertisement -

DUNA COMENTARIO

Please enter your comment!
Please enter your name here