Home General Prome Minister Eman na baluarte Johanna Figaroa-Tromp

Prome Minister Eman na baluarte Johanna Figaroa-Tromp

4
0
SHARE
- Advertisement -

“Ta importante pa nos tin un persona manera Mamai den cada bario”

ORANJESTAD(AAN): Bishitando bario di Montaña, Prome Minister Mike Eman a bay cas di famia Figaroa Tromp, unda a splica e programa di Gabinete Mike Eman pa pasa den bario cu funcionarionan di diferente departamento. Pero tambe ta reconoce un ciudadano di e bario pa su meritonan cu den e caso aki ta Johanna Figaroa-Tromp, conoci pa ta envolvi den actividadnan religioso ta haci trabao di hala hende cu dolor y yuda unda cu e por.

Ademas di cana den bario, “ta importante pa ora Gobierno no ta eynan e bario tin su hendenan cu por duna guía y inspiración. Pesey un baluarte di bario, manera Mamai, ta importante pa nos tin den cada bario. Manera nan ta bisa, miho un bon bisiña cu un famia leu,” e Prome Mandario a bisa na prome di haci entrega di e plakkaat di reconocemento na señora Johanna Figaroa-Tromp.
Eman a splica cu na momento di busca un baluarte den e bario aki a tende cu “Mamai” ta un bon bisiña cu tur hende den Montaña y hendenan rond Aruba conoce y ta busca ayudo cerca Mamai. “Pesey awe como Gobierno di Aruba nos kier reconoce Mamai pa e trabao bunita aki, pa ta un ciudadano y mama special. Nos mester di hopi Mamai den e comunidad aki pa yuda nos.” Prome Minister Eman a bira masha emocional na momento di duna palabra di elogio na Mamai, pasobra el a corda riba su mesun Mama cu no tey mas y kende a cria su ocho yiunan ora cu su esposo a fayece na edad relativamente hoben. “Mi mama a bringa hopi duro pa lanta tur ocho yiu den hopi contratiempo. E tabatin hopi di loke Mamai tin tambe, yuda bisiñanan y muchanan cu tin problema pa hiba nan riba e bon caminda. Pesey ora mi por duna reconocemento na un Mamai den un otro bario, ta manera recorda mi propio mama tambe. Mi ta hacie cu hopi amor y sentimentonan di recuerdo.”
Johanna Figaroa-Tromp, un persona di 89 aña di edad, tabata masha emociona un rato prome cu el a duna Prome Minister bendicion y a haci un oracion chikito cu e mandatario pa e keda semper cu e forsa y e bon curason cu e tin pa traha pa cada un habitante di pais Aruba, manera el a bin ta haciendo for di momento cu el a drenta politica.

 

- Advertisement -

DUNA COMENTARIO

Please enter your comment!
Please enter your name here