Home General Prome parti di exploracion sismico a keda cla y lo sigui...

Prome parti di exploracion sismico a keda cla y lo sigui cu procesamento di datonan compila

2
0
SHARE
- Advertisement -

ORANJESTAD (AAN) – Matutino DIARIO a acerca señor Armando Curet, director di e Compania Arubano di Petroleo (CAP), en busca di informacion tocante e ultimo desaroyonan riba e trabao di exploracion sismico cu ta tumando lugar den nos lama.

Señor Curet a duna di conoce cu e trabaonan cu a wordo haci ta e prome parti di e exploracion sismico cu ta un extension grandi di e area off shore di Aruba, cu ta e contrato cu tin cu Repsol.

Ta trata aki di un estudio sismico cu ta abarca un cantidad di mas di 350 kilometer di linea, y e datonan aki a wordo tuma den e periodo di mitad di Februari te cu dia prome di April.

E director di CAP a agrega cu despues di esaki ta bin un periodo bastante largo pa procesa tur e datonan cu a wordo compila den e temporada aki y lo sigui cu e fase di interpretacion di e datonan aki.

Señor Curet a indica cu apesar cu no ta mira mucho actividad despues cu e barco a bay, e trabaonan ta wordo haci den e centro di computer di Repsol, cu ta e contratista cu ta haciendo esakinan.

El a indica cu CAP ta premira cu pa September lo cuminza haya e prome resultadonan di e procesamento y despues di esaki lo tin e interpretacion geofisico pa wak si ta continua cu mas trabao ora ta dicidi cual ta e siguiente pasonan cu ta wordo tuma, wak si ta haci un investigacion mas detaya y esaki ta e status unda cu e exploracion aki ta.

Señor Curet a menciona cu e datonan preliminar cu ta conoci aworaki, sin cu nan a wordo procesa ainda, ta indica cu e calidad di informacion ta hopi bon, en todo caso hopi mehor cu loke a wordo haci den pasado.

El a expresa cu CAP ta optimista cu esakinan lo conduci na mas investigacion, pero e no por bisa nada riba cuanto trabao mas mester wordo haci.

El a menciona cu Repsol ta presente na Aruba den e manager local, pero e tripulacion y tur e ekipo no tey mas y cu por cierto no ta di Repsol pero nan ta wordo contrata pa e compania aki.

E proceso cu ta sigui na September ta uno normal mirando e cantidad di datonan cu a wordo adkiri, y señor Curet a señala cu incluso nan ta avanza den tempo segun e schedule cu tin palabra den e contrato.

E contrato, señor Curet a señala, ta wordo respeta manera e ta door di ambos partido y esaki ta keda asina alomenos cu ambos partner bay di acuerdo si tin algo di adapta na dje.

El a agrega cu e contrato ta contene un minimo di obligacionnan di trabao cu Repsol tin cu haci. E tin stipula, por ehemplo, cu tin un minimo di tres kilometer di linea cu tin cu wordo haci den e prome fase di e exploracion, y nan haci 3500 y pico. Kiermen, esey por pasobra e sorto di flexibilidad ey tin den e contrato.

 

- Advertisement -

DUNA COMENTARIO

Please enter your comment!
Please enter your name here