Home General Ta momento pa orienta riba kico Aruba y Venezuela por haci hunto

Ta momento pa orienta riba kico Aruba y Venezuela por haci hunto

0
0
SHARE
- Advertisement -

Prome Minister na aniversario di independencia di Venezuela

ORANJESTAD:(AAN)Manera ta conoci, ayera tabata dia 5 di juli, fecha di e di 202 aniversario di declaracion di independencia di Venezuela. Como nos pais bisiña y un nacion cu cual ta comparti un historia y amistad grandi, tabata di gran relevancia pa Gabinete Mike Eman comparti e fecha cu e representante insular y e comunidad Venezolano.

Pa tal motibo Prome Minister a atende e ceremonia teni diabierna mainta na Plasa Bolivariana, caminda tambe a pone krans na estatua di Libertador Simon Bolivar.

E mandatario a tuma e ocasion pa reitera e bon ambiente cu semper ta reina den e relacionnan cu e pais Latinoamericano y e multiple elemento cu ta comparti na nivel di historia, cultura y aspiracionnan. “Awe ta e dia pa haci e compromiso ey di nobo,” Premier Eman a bisa.

“E ta un momento grandi di celebracion pa Venezuela y pa orienta riba loke Aruba y Venezuela por haci hunto,” asina Prome Minister Mike Eman a duna di conoce ayera mainta. El a duna como ehempel e Memorandum of Understanding cu recientemente Aruba, Corsou, Hulanda y Venezuela a firma pa consolida e intencion di tur partido pa traha riba diferente tereno di interes mutuo.

E acuerdo ta habri caminda pa hopi oportunidad, sin embargo, e mandatario a menciona algun punto principal cu ta asuntonan energetico no solamente ta relaciona cu nos refineria, pero tambe e manera con Venezuela ta interesa den e avancenan riba energia alternativo cu Aruba ta trahando riba dje.
Otro aspecto cu ta mustra hopi prometedor pa ambos pais, ta e industria turistico.

E turista Venezolano, ta representa actualmente e di dos mercado di mas grandi pa Aruba, asina mes Gabinete Mike Eman ta mira cu tin espacio pa fortifica mas ainda e relacion aki. Di otro banda, kier wak den e posibilidad pa traha paketenan turistico na ambos destino, combinando conocemento y esfuersonan.

Poniendo e temanan strategico un banda, e celebracionnan solemne aki semper ta laga Minister President Eman recorda riba e lasonan humano mas esencial cu semper bay tin entre ambos pais, y e importancia pa mantene nan asina. En berdad, e celebracion nacional di independencia, sea na e propio pais of den exterior, ta un oportunidad pa renoba e sentido di compromiso y dignidad, pero tambe ta un momento pa celebra e aportenan grandi cu semper tin un pa otro.

Prome Minister Eman a indica cu ademas di Venezuela, paisnan manera “Colombia, Santo Domingo, Ecuador, Bolivia; tur e sociedadnan aki di un manera of otro ta forma parti hopi esencial di e desaroyo di pais Aruba. Bo ta wak e den figuranan di dokter, arkitecto, den construccion, y den di dos y tres generacionnan mas leu, den funcionnan publico importante y awe ta momento pa nos celebra e historia comun cu nos tin.”
Despues di e ceremonia riba Plasa Bolivariana, caminda el a comparti cu Jesus Javier Arias Cardenas, Consul General de la Republica Bolivariana de Venezuela ademas di otro representantenan di e colonia Venezolano na Aruba, nos hefe di gobierno a pone enfasis pa no solamente wak atras riba e pasado, pero tambe wak dilanti na loke por haci hunto. “Den e historia comparti ta pone un base tambe pa futuro. Kico ta e metanan comun cu nos tin pa crea un bienestar general.”

- Advertisement -

DUNA COMENTARIO

Please enter your comment!
Please enter your name here