Home General Trahamento di shift segun ordenanza Laboral 2013

Trahamento di shift segun ordenanza Laboral 2013

10
0
SHARE
- Advertisement -

ORANJESTAD    (AAN):   Departamento di Labor y Investigacion ta desea di duna informacion tocante e ley laboral cu ta regarda entre otro trahamento den shift. Entrante 1 di April 2013 a drenta na e vigor e OL 2013. E ley aki ta regla diferente topico, por ehempel e horario nan permiti pa traha, e dianan di sosiego y e compensacion pa overtime. Un di e cambio nana cu OL 2013 a trece cune ta e introduccion di e sistema di traha shift (Ploegenarbeid) den sectornan cu no ta Horeca, casino of continuo. Ta trata di un sistema pa brinda flexibilidad den cierto sectornan pa por traha ariba diadomingo y algun dia di fiesta, sin mucho gasto halto di personal pa e dunador di trabao.

Mester menciona si aunke cu e OL 2013 ta brinda e posibilidad aki, e mesun ley stipula a base di articulo 34 cu Director di Departamento di Labor y Investigacion (DAO) ta esun authorisa a stipula cua ta e companianan cu no mag di uza e sistema aki di traha shift. E competencia aki a wordo duna na e director, como cu e consecuencianan pa un trahado cu ta traha shift ta encera entre otro cu riba diadomingo e lo mester traha un rate di 100% (no 200% manera antes tabata e caso prome cu 1 di April 2013).

Te na e momentonan e director no a determina oficialmente cua te companianan cu no por traha den shift y cualnan si. DAO tin cierto indicacionnan pa cual sectornan lo ta atractivo pa traha shift, pero no tin un bista completo riba e consecuencianan financiero pa e trahadornan den e sectornan aki. Pa es motibo aki a dicidi pa hasi un investigacion amplio ariba e mercado laboral, pa determina cua companianan lo no ser permiti pa laga su trahadornan traha trabao shift y pues cua nan si, pues por lo pronto ningun Compania ta ser permiti pa traha shift.

A base die resultadonan di e investigacion lo determina cua Compania cu no mag traha shift ( lista 1 di companianan normal) y cua companianan si mag traha shift ( lista 2 di companianan shift). E listanan aki lo wordo publica den medionan di comunicacion, pa asina tur doño di trabao y tur trahado ta debidamente na altura di esakinan.

Esaki ta significa cu tanten cu e director no laga publica oficialmente e listanan, ningun compania por aplica e sistema di shift ainda. Esaki pues ta encera cu tur trahado cu ta traha riba diadomingo y pa kendenan e OL 2013 ta aplicable, mester wordo paga 200% pa esaki.

DAO ta spera di por conta cu comprension di e doñonan cu ta wordo afecta pa e decision aki, specialmente si tene na cuenta cu ta trata di un fase transitorio y cu e listanan oficial lo wordo publica dentro di un tempo razonable.

Por ultimo DAO kier enfatisa un biaha mas cu e sistema di shift aki no ta conta pa e sectornan Horeca, casino y continuo, na unda cu e diadomingo por ta un dia normal di trabao.

 

- Advertisement -

DUNA COMENTARIO

Please enter your comment!
Please enter your name here