Parlamentario Juan David Yrausquin:
ORANJESTAD(AAN): Durante e conferencia di prensa di AVP, Parlamentario Juan David Yrausquin a comenta riba e rapport di IMF riba Aruba a keda cla y entrega. “Mi ta kere cu tur esnan cu tabata ansioso pa mira e rapport final aki, kizas a keda un poco desapunta, specialmente esnan di oposicion cu a crea henter un discusion masha grandi cu nos ta sconde rapport, cu e ta contene informacion cu ta nifica e final AVP, … informacionnan cu ta totalmente eroneo,” el a duna di conoce.
E rapport final di IMF ta confirma loke esun inicial a menciona caba, pero a bay un poco mas extension den e informacion cu nan ta trece padilanti. E Parlamentario a señala cu IMF ta splica cu Aruba a pasa den retonan economico hopi pisa, cu na 2009 y 2010 e economia di e isla a cay cu 15%. E tabata un di e crisisnan mas grandi den henter Caribe. Hopi pais grandi no a pasa den un caida economico asina grandi manera esun di Aruba.
Pero e rapport di IMF ta splica tambe cu pa aña 2013 y 2014, ta worde proyecta crecemento economico real, esta 2.3% y 3% respectivamente. Yrausquin a indica cu esaki ta informacionnan cu nan a worde informa di dje caba door di institutonan na Aruba, manera Banco Central cu el a sigura ta institutonan cu ta haci un trabao grandi y duna informacion valioso, cu mester worde scucha.
E Parlamentario di AVP a splica cu IMF y Banco Central ta papia di retonan cu pais Aruba ta bay enfrenta of ta enfrentando. Pa e politico ta importante pa no papia solamente di retonan pero e forma con ta bay atende cu e retonan. “Nos tin awor perspectivanan economico positivo y mester balansa nos presupuesto den e añanan nos dilanti. E ta un compromiso cu nos partido ta asumi,” ta su opinion.
El a indica cu denter di poco AVP lo tin un congreso durante cual e programa di e partido lo worde presenta na tur miembronan di partido pa aprobacion, of trece cambio den e programa di partido. Den e programa ta aparece con ta bay atende cu e retonan, balansando presupuesto pero sin perhudica e recuperacion y perspectiva economico menciona.
Loke ta bay pidi miembrecia aproba ta pa Gobierno percura cu e recuperacion y crecemento economico worde solidifica. Mester sigura cu e crecemento economico aki ta worde realisa, sigui controla e gastonan (siguiendo ehempel di 2013).
El a splica cu e presupuesto di 2013 tabata e prome den dies aña cu e gastonan ta mas abou cu e aña anterior. “Esaki ta e linea cu nos mester sigui den e añanan siguiente,” el a indica.
