Home Editorial Editorial: E LISTANAN

Editorial: E LISTANAN

1
0
SHARE
- Advertisement -

               Por fin nos a haya e listanan mira, y francamente bisa nan no a convencemi di nan balor den e obtencion di votonan. Mi ta custumbra di mira y traha cu listanan politico den pasado. No tabata falta e payasadanan, pero e biaha aki nan a supera tur expectativa, danki na e gañado cronico. Rudy Lampe, kende a presenta cu un grupo di enmasacardo, comosifuera e ta e Lone Ranger y e resto imitadornan di su indian compañero. Djey el a papia un tou di disparate sin ningun sentido. El a cuminza cu ataca cierto miembronan di comunidad di prensa, (DIARIO en especial), demostrando un biaha mas su falta di criterio y alavez un deseo tragico di auto-destruccion. Pa djey agrega cu cada miembro di su diez candidatonan ta bay saca 1000 voto cada un, ta un locura di marca mayor, ya cu mi por bise di antemano cu ni nan tur hunto ta bay saca 1000 voto!

                Pa un ex-pastor sinta gaña cu e ta bay legaliza e uso di marihuana, ta parcemi hopi  baho pasobra e ta focus riba e debilidad di esnan cu por a cay den e maluso di e producto dañino ey. Ta solamente den un mente diabolico algo asina por tuma lugar, pasobra si e saca 1 asiento mes (loke ta super dudoso) e no ta bay por haci absolutamente nada den Parlamento. Ta di unda e ta kere cu e ta bay saca 10 otro Parlamentario mes gañado cune pa por pasa un Ley asina devastador pa hubentud Arubiano? Nan ta bisa berdad cu cada loco mester ser laga cu su tema, pero den e caso aki mester expone e loco pa e mentiroso cu e ta y semper tabata.

                Cu e lista cu Andin a presenta, mi ta duda cu e ta bay yega na 1 asiento, pasobra mi no por a nota algun candidato cu por yude yega na e cifra magico rekeri pa logra un representacion den Parlamento. Mi por ta ekiboca, pero mi ta duda cu e ta bay por logra retene e asiento cu e tin awor, pero den politica bo no por papia nunca cu un seguridad absoluto. Ta cuestion di spera e dia di eleccion pa mira si mi ta ekiboca den mi huicio.

                Pa loke ta trata Booshi, su lista ta aceptable, pero no suficientemente bon pa logra 1 asiento tampoco. Su number dos, ta bay yude hopi pasobra e ta un persona serio y bakia den politica, pero ni asina mi ta kere cu e lo por logra su acometido. Mester tene na cuenta cu e ta bay competi contra dos partido grandi, bon estableci y cu un base grandi di seguidornan. Booshi ta un bon politico, pero aki no ta trata di esey sino di un poder di convencimento cu ta parcemi cu e no tin. Fuera di esey e ta bin di un badabada grandi entre su ex-partido (MEP) y e mes. Henter e episodio ey a laga un impresion nada favorable pa ningun di nan dos.

                Djey ta bin e eterno Benny Nisbet cu su PPA di custumbra, yen di colorido y poco substancia. Benny tabata un bon Parlamentario, pero den e campo di realismo el a faya pa compronde e berdadero problema di su partido, y si el a compronde mes, el a prefera di ignore.  Mi no ta mira PPA haci un comeback logrando 1 asiento. Mi no ta kere cu e ta bay por alcanza e cifra necesario di votonan pa drenta Parlamento un biaha mas.

                Pa loke ta trata MEP, e lista no ta balancea, y bo ta nota e falta di un Booshi, un Marisol, un Mervin, y otronan cu a bandona o a ser saca di e partido. MEP semper a conta cu un base considerable di apoyadornan, pero cu a bin ta disminui cu cada eleccion, especialmente e ultimo cu a tuma lugar. Su base ya no ta mes fuerte, y su candidatonan menos ainda. E tin varios figura di importancia riba lista, y si nan funciona bon, e por logra algun asiento mas di loke ta ser spera di dje. Ta cuestion di calcula cuanto asiento e ta bay reparti cu AVP na September. Tin 21 asiento pa distribui  entre nan dos, pasobra mi no ta mira e partidonan chikito logra 1 asiento cualke un di nan, pesey e posibilidadnan di MEP ta indica un mehoria, pero no di gran magnitud. Su maximo obtenible, segun mi calculonan, ta 7 asiento. Mi no ta mire cu mas, pero si su hendenan no trece aden e votonan, e ta bay baha te 6 o hasta 5 asiento. E resto ta bay keda pa AVP.

                E lista mas fuerte y consecuente entrega ta esun di e partido berde. Su prome cinco nan so ta suficiente pa acapara un cantidad considerable di asiento. E unico figura dudoso cu e tin riba lista ta su number 6, o sea Artur Dowers. Segun mi, na cabez di su dos departamentonan, el a crea un ambiente negativo pa su partido, y a strañami cu Mike a compense cu number 6 pa e daño politico cu el a causa. Ta algo cu mi no ta compronde y no ta bay compronde tampoco, ni maske cuanto splicacion hustificativo bin padilanti.

Bo ta haya tambe otro candidato cu a perfila su mes den su trayectoria como un Parlamentario cu a falta respet den diferente ocasion pa e mistica y plataforma politico di su partido, y a yega asina leu di a hasta vota contra su propio fraccion den Parlamento, y cu den mas di un ocasion a ataca su mesun Ministronan riba diferente aspecto di nan carteranan y nan decisionnan. Pero, ta Mike Eman y su conhunto di conseheronan ta dicidi riba e cosnan aki y ta nan a traha e lista, no ami.

Di tur manera, cu nan o sin nan, mi no ta mira AVP saca menos di 14 asiento.

               

                 

 

- Advertisement -

DUNA COMENTARIO

Please enter your comment!
Please enter your name here