DEN HAAG: E organizacion terorista al-Qaeda Diadomingo a cumpli 25 aña di existencia.
Osama bin Laden a funda e organizacion riba 11 di Augustus 1988 na Pakistan.
E hubileo tabata motibo pa lider di PVV Geert Wilders reacciona un biaha mas fuertemente contra Islam.
Riba Twitter el a yama profeta Mohammed un “pedofil loco di remate”.
“25 aña terror di Al Qaeda, den nomber di un pedofile loco di remate, pero civilizacion semper ta gana for di barbaridad”, ta locual cu Wilders a pone riba Twitter.
E organizacion terorista tin mundo Occidental den su gara atrobe durante ultimo dianan.
Servicionan di informacion Mericano a intercepta recientemente comunicacion entre e lider mas halto di al-Qaeda, Ayman al-Zawahiri y lider di e seccion Arabe di al-Qaeda situa den Yemen.
Ta trata di comunicacion electronico den cual Al-Zawahiri lo ta dunando orden pa un atake riba termino cortico.
Den Sanaa, e capital di Yemen, recientemente a tuma medidanan pisa di seguridad.
Centenares di vehiculonan militar special, ta vigila e paleis presidencial, embahadanan occidental y otro edificionan.
E embahada Hulandes na Yemen tambe ta un blanco potencial di un atake terorista.
Minister Frans Timmermans di Asuntonan Exterior, Diaranzon pasa a yama bek e ultimo empleadonan for di e embahada na Yemen.
Mientrastanto nan a Sali for di e pais caba.
