Home Politica “Ban sigui traha hunto pa nos pais, pa nos yiunan y pa...

“Ban sigui traha hunto pa nos pais, pa nos yiunan y pa futuro”

0
0
SHARE
- Advertisement -

Benny Sevinger, candidato #2 riba lista di AVP na comunidad Latino:

ORANJESTAD (AAN):     Den su palabranan expresa diasabra anochi, Benny Sevinger a bisa e comunidad Latino na Aruba cu temponan dificil di trato inhumano a keda atras y cu ademas di tur e avancenan haci te cu aworaki, e miho ta na caminda for di man di e vision y maneho di partido AVP.

     E encuentro cu e diferente colonianan Latino a tuma luga na sede di Rancho Floralina caminda un grupo grandi di persona a bin pa gradici Sevinger pa tur loke el a haci den tereno di integracion, pero tambe pa tende kico tin planea pa futuro.  

    Den gobierno Sevinger tin den su responsabilidad tres cartera importante. Banda di infrastructura y medio ambiente, tambe e ta maneha tur asunto di Integracion y no Admision, manera e tabata yama antes.

“Ultimo cuater aña tabata añanan dificil; sin embargo cu pueblo y Dios mediante nos a cana hunto pa cambia futuro di e pais,” Sevinger a bisa.

    El a pone hopi enfasis cu nos no mester lubida con a haya e pais, y particularmente e colonianan. “Ningun hende por a bishita su famia, no tabatin visa, etc. Gobierno anterior tabata traha solamente cu e modelo Suizo. E permiso pa un maximo di tres aña tabata wordo aplica pa esnan cu ya caba tabata biba aki. 

     “Tur cu ta biba aki, cu ta comparti cu nos, cu ta duna e sodo di nan frenta pa pone pan riba mes y pa contribui na economia di e isla, nos ta bisa nan bon bini na e pais,” tabata palabranan sincero di e candidato number dos riba lista berde. El a pidi tur presente pa nos cay den mentira di e promesanan falso cu tur partido ta purba saca den e ultimo dianan aki. “’Bay bek bo pais’ tabata e mensahe di partido geel y awe ainda nan tin e mesun mentalidad. Esey ta e diferencia entre e gobierno actual y esun anterior. Awe nos ta papia di integracion y no discriminacion,” esey Benny Sevinger a pone hopi cla.

     El a splica cu gobierno di Gabinete Mike Eman a atende e pueblo riba su necesidadnan sin puntra si nan tin permiso of no of si nan tin un paspoort of no. “E gobierno aki a habri porta pa e ser humano; e gobierno aki a bisa cu tur mucha cu of sin papel ta bay scol.”

      Sevinger ta corda con nan tabata haya mama cu tata cu awa na wowo pasobra nan no por a reuni cu nan famia. E opcion ey no tabata existi pa e gobierno anterior. Awendia, si bo ta cumpli cu e rekisitonan, bo por tin bo famia banda di bo. “Esey ta e trato humano!”  Tempo cu ningun hende por a haya firma liber pasobra burocracia semper a percura pa tin buraco den e 10 aña di permiso, ta algo cu a keda pa pasado. Mentalidad enfermo ya no ta boicotea mas e deseo di bon ciudadanonan pa biba na Aruba. “Nos ta pensa diferente cu e gobierno anterior. E gobierno aki ta di pueblo, ta un gobierno cu tin curazon, y tin un mente pa traha pa tur cu ta biba riba e isla. Nos tur ta yiu di Dios, nos tur ta comparti e mesun filosofia, e idea di traha pa nos yiunan, traha pa nos pais, traha pa e futuro generacion,” tabata e palabranan di Benny Sevinger.

     Prome cu el a termina, el a splica cu ainda falta hopi pa haci. “Ainda nos ta wak dolor di mucha, di mama y tata. Tin hopi ley pa cambia ainda. Pero si boso a wak un cambia den ultimo 4 aña, prepara pasobra den e proximo 4 aña lo ta hopi miho.” E palabranan di Benny Sevinger tabata compaña pa hopi aplausa y grito di alegria y satisfaccion di parti di e publico presente. Nan a demostra nan apoyo, entre otro, dor di crea gritonan di apoyo manera “Se ve, se siente…Benny esta presente!”

- Advertisement -

DUNA COMENTARIO

Please enter your comment!
Please enter your name here