ORANJESTAD (AAN): Pa mas of menos 11or di mainta diasabra a presenta un problema na planta di WEB, cu consecuencia cu no por a sigui cumpli cu e demanda pa NV Elmar. Mester a reduci e demanda den forma significante, afectando hopi bario rond di henter nos isla cu a keda sin coriente.
NV Elmar a informa cu di acuerdo cu nan maneho den momentonan di crisis, a manda yama un cantidad di empleado y tecniconan pa raporta na trabou mesora.
A cuminsa cu trabounan di preparacion pa asina cu WEB por suministra mas coriente, pa nan por a distribui pa e diferente stationnan di NV Elmar cu na nan turno ta sigui distribui pa henter comunidad.
Tur esey mientras cu na oficina principal di NV Elmar situa den Wilhelminastraat tabatin extra personal trahando pa contesta tur e yamadanan di telefon cu tabata drenta.
Aunke cu NV Elmar no por haci nada, clientenan tabata keda contento di tabata haya un stem amabel na otro banda di telefon, contestando cu no tabatin un orario specifico ki ora coriente lo a bin bek, pero si cu e clientenan por ta sigur cu tecniconan ta trahando duro pa soluciona e problemanan.
Pa exactamente 6or di atardi NV Elmar a informa cu henter Aruba a haya coriente bek. Na WEB tecniconan tabata analisando e situacion y investiga kico a sosode exactamente cu a causa cu no por a sigui produci coriente mas pa cumpli cu e demanda di NV Elmar.
E compania nacional di distribucion di coriente ta pidi disculpa na su clientenan pa e inconveniencia cu e interupcion di coriente por a causa diasabra. Varios negoshi mester a sera nan porta etc. Tin cu por a core acomoda un generator pa por a sigui draai e negoshi net na e momentonan mas crucial di dia pa loke ta benta. Super Food entre otro ta un di esnan den comercio cu mester a sera un rato te ora por a acomoda un Delco.
