Home Editorial EDITORIAL: E DESESPERACION TA BIRANDO GRANDI

EDITORIAL: E DESESPERACION TA BIRANDO GRANDI

1
0
SHARE
- Advertisement -

            E desesperacion di tanto MEP como PDR, despues cu abiertamente nan a mustra nan comprension cu otro, ta birando cada dia mas grandi. Actonan vandalico relaciona cu bandera, uso diabolico di molotov cocktail contra un simple garashi, declaracionnan via nan simpatisantenan cu no bal un contesta pasobra ‘de bagazo no se hace caso’, tur ta indicacionnan importante di e fortaleza di AVP. Aki no tin awa pa laba, e derota cu MEP y su satelitenan ta bay sufri otro siman ta bay ta grandi, hopi mas grandi di loke nan ta kere o por soña.

            Ora un Gobierno ta traha bon, e ta visible pa henter comunidad. Loke AVP (Otmar) a haci cu turismo ta algo grandioso, imposible pa describi cu husticia usando algun palabra, y e mehoracion na caminda (di Benny) ta transformando Aruba di un isla drumi den letargia durante hopi aña, den un pais energico, vistoso, bon organiza pa su entrada den un futuro exigente. E ta bay sirbi como ehemplo di loke un bon Gobierno por logra pa su pais. Pa no papia mes di e innovacionnan di Mike de Meza y Winklaar, cu ta dunando finanzanan publico otro cara, o sea esun moderno y practico, funcional y propicio pa un isla di nos tamaño.

            Mi a nota un atake mas intenso ultimamente contra Paul Croes, kende den su prome aparicion riba lista a logra 1578 voto! Un gran hazaña! Pakico tanto atencion di e partido mas grandi di oposicion? Pasobra Paul ta un opcion real, cu no ta defende interesnan familiar riba interesnan di Pueblo, cu a demostra cu e tey pa sirbi Aruba. Tur esaki por a causa un conmocion y disturbio den seno di MEP, loke por a causa e intencion di mancha su bon nomber y integridad. E ta hibando un campaña limpi, bon organiza y profesional. Esey ta bay cosecha pe un gran cantidad di voto personal.

            Pa loke ta trata Andin Bikker, el pasa forma parti di e molde bieu di MEP, o sea mete innecesariamente cu DIARIO sin ningun provocacion di nos parti. Su arogancia, cu ta su peor enemigo, a manera djindja ultimo temponan, y e ta sintie un profeta todopoderoso di politica. E ta hasta indicando cu sin PDR no por tin Gobierno. Bon, pa bise den un forma conciso: “soñar no cuesta nada”. E dal bay numa cu su mentor nobo,  y e ta bay mira dia 27 di September kico e Pueblo votador ta pensa di su alianza o comprension cu un partido cu a goberna Aruba durante 8 aña y no a haci nada otro cu yena e saconan di e famianan di e Ministronan, a practica un nepotismo nunca antes bisto na Aruba, a crea un debe enorme hincando fortunanan den saco di amigonan y famianan, na lugar di inverti e placa den obranan beneficioso pa Pueblo, a laga Aruba den mil y un necesidad, a bandona turismo, a bringa contra e refineria te cu el a cera, a core cu KLM y Carnival Cruise lines, enfin, cu a causa un desastre sin precedente. Y ta cune un persona cu ta considera su mes inteligente ta cuchicuchi? Foei, Andin!

            Mi no tin e custumbra di contesta ken cu ta, menos ainda si e ta di un nivel mes baho cu esun di e tercio di Dakota cu a scupi su gal na top95. Mi no sa con e doño ta dune espacio pa e mustra su amargura, su rabia, su baheza, pero principalmente su envidia, sin sa cuanto e tercio falso ey a bin papia di dje na DIARIO, y con el a rebahe te suela. Apesar cu e doño a dune espacio na su radio pa e papia su basuranan, mi amistad y acuerdo cune ta keda firme.

            Nos tur tin nos preferencianan politico, pero esey no mester converti  nos den enemigo di otro. Campañanan ta bin y ta bay, pero amistadnan tey pa keda. Hendenan sabi o cu tin un bon sentido comun, ta compronde kico mi kier meen.

           

           

 

 

- Advertisement -

DUNA COMENTARIO

Please enter your comment!
Please enter your name here