Editorial: E DIFERENCIANAN!

            Durante eleccion, di repente varios persona ta bira clarividente, o gitano, o simple miradornan di futuro. Cu nan por ta ekiboca no ta ni sikiera cruza nan mentenan, pero e boca si ta acelera cu e velocidad di luz. Lemanan absurdo ta sali di nan mentenan manera anglo den tempo di awacero. Pero, sinta studia o compara e topiconan riba mesa? Di esey si nan no ta capaz. Pasobra si nan tabata, anto e diferencianan lo ta mes cla pa nan cu e luz di solo.

            Por ehemplo, e huur contract cu Gobierno a cera cu e doño di e ex-edificio di Brenchi ta un compromiso cu un comerciante cu no ta ni ruman ni famia di un di e Ministronan. Ademas, e edificio a ser gehuur pa cumpli cu un necesidad di Pueblo, no pa yena e saco di algun familiar.

En cambio, e edificionan cu MEP a huur ta di un ruman homber di Evelyn Wever Croes, y e otro edificio ta pertenece na otro miembronan di e mesun famia. Aki tin un diferencia etico y moral cu no por scapa di e persona cu ta studia e asuntonan aki na un manera imparcial. Saca placa pa faborece Pueblo ta un cos, y yena e saconan di familiarnan ta completamente otro cos. Esun cu no ta mira e diferencia por wel di sigui bisti su bril di palo numa, pasobra e ta keda fuera di cualke redencion o conversion pa e berdad. Dios simplemente no a faborece cu un ‘tiki’ di capacidad analitico.

            Otro asunto remarcable ta e lema di “paga e debe”, comosifuera ta bay por keda sin pague! Claro cu e mester worde paga y e ta bay ser paga! Awor, si e partido di esun cu ta ripiti sin pensa no tin e capacidad pa paga e debe, ta otro cos. Anto mester descarta cualke posibilidad cu e por logra e confianza di Pueblo pa dirigi nos isla. Esey ta bay ta evidente dia 27 di e luna aki. Loke nos tin mester ta un Gobierno cu ya a haci hopi caba pa nos isla, y ta dispuesto di haci mas! Nos no tin mester, y no kier tampoco, un Gobierno cu di antemano ta lamenta cu man na cabez “con mi ta bay haci pa paga e debe”! Lague anto pa esnan cu por y ta dispuesto di hacie sin ningun yoramento.

            Otro cos cu mi kier aclarea ta e asunto di Glembert. Contrario na loke algun por pensa, ami no tin nada di haber cu e publicacionnan ey. Si Glembert por ta culpable di algun imprudencia e lo tin di enfrente. E sa masha bon ken a hinke den buchi di e Boutersenan. E ta cana cune tur caminda, y hasta a pone riba su lista tempo di OLA. Ora bo ta den mal compania, y bo no realiza esey, no tira culpa riba ningun otro persona sino riba bo mes. Pasobra ningun hende a mandabo cera un amistad asina fuerte cu e tercio dudoso ey di Surinam. Ta el a hincabo den e problemanan cu ta surgiendo awor riba nivel internacional, y lo ta hopi pober di parti di Glembert pa culpa cualke otro persona(nan) na lugar di expone e tercio mes cu a hibe riba un mal caminda.

            Mi opinion riba e resultado di eleccion no a cambia. Mi ta convenci awor mas cu nunca cu AVP ta bay bolbe goberna su so. No ta bay tin un coalicion pasobra ningun di e partidonan chikito ta mustrando e forza politico necesario pa saca 1 asiento. E ta posible, pero no ta a la bista aworaki.  Ademas, MEP no ta demostrando tampoco e fortaleza cu e ta pretende di tin pa logra mas di 6 asiento. Cu algun bon candidato so (Endy, Roy, Karel, Bessaril, y un par mas) e no ta bay logre. E tin un caminda largo y yen di sumpiña pa cana, y mi ta duda cu den dos siman di tempo e ta bay por yega e final cu exito.

            Cu mi ta faborece AVP? Definitivamente! Danki na ken? Na Nel Oduber ‘himself’! E no por sinta kere cu tur loke el a intenta contra DIARIO a ser lubida! E stickernan, e convocacion pa boycot den mas di un ocasion, e nengamento di duna DIARIO 1 solo aviso di Gobierno durante 8 aña, su presion riba comerciantenan pa no pone aviso cerca nos, su intencion maligno di destrui nos corant, su uso di belastingsdienst como un herment politico pa persegui nos, tur esey y hopi otro cos cu el a haci a pusha nos iremediablemente den scochi di AVP. Y mi ta agradece awe tur e accionnan negativo cu el a emprende contra nos, pasobra awor mi ta forma parti ideologicamente di un partido serio, yen di talento y boluntad pa drecha tur loke a ser daña den e 8 añanan fatidico di un mal Gobierno. Danki , Nel!