Home Editorial Editorial: E RECTA FINAL DI ELECCION

Editorial: E RECTA FINAL DI ELECCION

0
0
SHARE
- Advertisement -

            Nos a yega e recta final di eleccion, faltando solamente 1 siman pa nos acudi na e urnanan electoral pa scoge e mandatarionan cu ta bay dirigi e destino di Aruba durante e proximo 4 añanan. Mescos cu mi, mayoria di votadornan sa caba con nan ta bay vota y pa ken, pero di tur manera ta bon pa nos repasa un punto cu no a ser debati cu suficiente energia durante e campaña. Tur loke nos a tende te awor ta e huurmento di edificionan bashi, cu un Huez Hulandes, procedente casi sigur di e siembranan di batata na Hulanda, a sanciona. Con e por a hinca den su cabez cu un pago pa un edificio cu no ta ser usa ta bon pasobra tin un contrato de por medio, aunke claramente y sin duda e tabata bon al tanto cu e contrato a ser manipula sacando for di dje un clausula necesario djis pa faborece familiarnan, mi no ta compronde! E clase di sentencianan ey ta caba di reconfirma e duda fuerte cu mi tin den e capacidad analitico y husticiero di algun Huez cu a toca nos ultimamente. Di mi parti nan por wel di pak maleta di biaha y bay back for di unda nan a bin.

            E punto politico cu nos mester presta bon atencion na dje ta relaciona cu e ideologia di e dos partidonan grandi, ya cu e chikitonan dificilmente ta bay logra un figuracion exitoso. Si nos studia e trayectoria di e dos partidonan ey, anto nos ta yega na e conclusion cu MEP su ideologia ta concentra riba e independencia di Aruba, y esun di AVP riba e permanencia di Aruba den Reino Hulandes. For di tempo di Betico, e pensamento pa ta liber di Hulanda a predomina, y te ultimo Rudy tabata defende e independencia ey cu alma, curazon y curpa. Si tabata tin, o tin, algun probecho pa nos den un situacion asina, mi lo bisa cu ta bon, ban pe. Pero ta den man di kendenan nos ta bay pone Aruba den un independencia total, o sea los di Hulanda? Con nos ta bay regla nos cuentanan pa nos isla no bay atras den tur sentido? En cambio, te awe a bay nos bon cu Hulanda, nos a hereda di dje orden y respet pa Ley, nos a obtene un pasport acepta rond di mundo, e tey semper pa duna nos un man den cualke percance cu nos mes no por soluciona, enfin e ta e as cu nos tin bao nos manganan di camisa. Ta ken den su sano huicio kier deshaci nos isla di tur loke Hulanda ta representa pa nos?

            AVP, en cambio, nunca a duda den e lazonan cu nos mester mantene y fortifica cu Hulanda. Tur loke MEP a daña cu su insolencia frente e politiconan Hulandes, AVP a coregi den corto tempo. Awe nos tin relacionnan optimo cu Madre Patria, y ta mehora so e relacionnan ey ta bay mehora na momento cu AVP bolbe asumi e direccion di nos isla, si esey bira e caso, Diabierna di otro siman. Nunca mi a bisa ningun hende con e mester vota, pero mi a yega di pidi nan si pa usa nan cabez y studia e situacion politico bon, pasobra cada voto ta conta o pa e bon o pa e malo di Aruba. Esaki ta un eleccion hopi importante, y e opcion ta o vota pa un partido cu no ta haci nada otro cu yora dia aden dia afo pa e debe cu nos tin, comosifuera nos ta e unico pais na mundo cu tin e problema ey, desconociendo e magnitud di e debe di Merca, sin cu el a afecta e funcionamento di su economia.

Y e yoramento ta parcemi hipocrita, pasobra ata e partido ey ta haciendo tur su esfuerzonan pa logra un maximo di asiento pa e bay goberna cu e mesun debe ey riba su cabez! Of e debe ta spanta nan di tal forma cu nan no kier goberna cune guinda riba nan cabeznan, of nan yoramento no ta nada otro cu un hipocresia basa riba lagrimanan di cocodrilo. Cu e debe ta grandi?  Si. Pero nunca proporcionalmente mes grandi cu esun di Merca o hopi di e paisnan Europeo, y tur nan economianan ta sigui drey.

            E escogencia pa mi ta claro: lagami keda cu mi pasport Hulandes, cu mi no ta dispuesto di entrega di ningun manera, mi nacionalidad Hulandes cu tampoco ta negociable pa ningun otro, ni sikiera esun Americano, y lagami keda como ciudadano cu e privilegio di pertenece na un Reino di hopi balor. Hulandes mi ta, y Hulandes mi kier keda!

           

- Advertisement -

DUNA COMENTARIO

Please enter your comment!
Please enter your name here