Mi no sa kendenan ta aconsehando MEP, pero e indicacionnan cu tin te awor no ta mustra den un bon direccion, o sea uno limpi, cu un focus riba issue y no riba persona. Awor algun ta papiando hasta di un bomb cu ta bay rebenta dia 23 o 25 di September, o sea un par di dia prome cu votacion. Mi no sa ta di ki clase di bomb nan ta papiando, pero ainda tin tempo pa esnan cu ta proponiendo e clase di accion ey splica nos ki relacion e tin cu e solucionnan cu tin mester pa e diferente problemanan cu nos ta enfrenta. Laga nan splica nos alavez si nan ta consciente di loke a pasa durante e eleccionnan anterior, y cu nan sa di e otro megabombnan cu di repente por rebenta den nan caranan y laga nan na werki. Ignorancia di hechonan no ta un hustificacion, sino mas bien un condena.
Nos ta interesa den e issuenan cu tin riba mesa, y loke nos tin ta e speranza di mira, tende y lesa con cada partido ta bay abarca nan y kico nan ta ofrece como solucion. Ban papia di finanzanan, por ehemplo, y e pretension cu Aruba ta den asina tanto debe cu e lo tin e tendencia di pasa over pa nos yiunan y nietonan,y otronan cu ta sigui nan. E no ta nada otro cu declaracionnan alegre, basa riba raportnan cu nan no ta compronde, y un falta di conocimento con e economia di un pais ta drey, y kico tin disponble riba e mercadonan internacional. Claro cu e Gobierno actual a gasta hopi placa. E no ta scondi; e ta visible tur caminda. Pero, alega cu e debe grandi cu nos tin ta bay ser hereda pa e generacionnan venidero, y no soluciona durante e proximo 4 añanan di gobernacion, ta parcemi un producto di mentenan cu no tin e custumbra di pensa bon, o simplemente ta incapaz di hacie.
E no ta un problema cu tin un solucion facil, pero e no ta dje dificil ey tampoco. Nos tin socionan cu ta dispuesto di duna nos un man, bao nan supervision y probablemente control, cu no lo hesita ni un seconde pa asisti nos. Mi ta tende hopi di e problema, pero te ainda mi no a tende ni un solo oferta di ningun partido di oposicion pa bin cu e solucion cu tin mester. Bla bla bla henter dia riba e tema no ta bay aminore ni contribui na su solucion. Laga nos scucha y mira e plan cu e partido cu cada rato ta vocifera riba e problema tin pa enfrente una vez e logra drenta den Gobierno, si esey bira e caso.
Si ta desesperacion ta guiando nan pensamentonan, miho nan dal un par di valium o lexotanil, pa calma nan nervionan, y traha mas duro pa logra lo maximo posible di asientonan na September. Mi a bisa caba y mi ta bolbe ripiti: AVP no ta bay perde eleccion! E caminda cu ta keda habri pa e otro partidonan ta esun di reorganizacion, ampliacion di nan basenan, atrae candidatonan cu bon posibilidad di acapara voto, y haci tur loke nan por pa logra e maximo posible den e eleccion cu ta den progreso. Bin cu ideanan loco, impulsa pa un radicalismo ireal, ta parcemi propio di esnan cu ta reconoce nan derota di antemano pero no por gulie.
Un cos mi ta recorda e loconan di MEP cu ta proponiendo bombnan di cosnan personal como solucion pa cualke problema cu nos por tin: no perde for di bista e otro megabombnan cu por rebenta inmediatamente despues pa laga varios candidato riba lista completamente destrui, especialmente e lider y su tata. Material tin na granel y ta preferible pa nan keda unda cu nan ta, o sea den archivonan, y no sali den claridad di solo. Keremi cu nan ta devastador!
Mi conseho ta: esun cu tin manteca riba su cabez no tribi di sali den solo, pasobra e ta bay dirti y sushe completamente! Y esunnan cu kier bula cu hala di celofan, wak pa nan no bay mas halto cu un par di meter, pasobra nan caida lo ta espectacular!
