Home Politica Introduccion di un Kinder Ombudsman lo aporta na mehora e calidad di...

Introduccion di un Kinder Ombudsman lo aporta na mehora e calidad di bida di muchanan

1
0
SHARE
- Advertisement -

Parlamentario Marisol Lopez Tromp:

ORANJESTAD(AAN): E programa di partido AVP ‘Progreso pa un y tur’ a keda cla y diferente punto di den e programa a keda presenta durante e Congreso cu a tuma lugar recien. Segun Parlamentario Marisol Lopez Tromp, enfocando riba e parti social, educacion y derechonan di mucha p.e. na nan cas y na school, recientemente un rapport di UNICEF a keda presenta a base di un investigacion amplio den Reino Hulandes. E rapport aki a mustra cu tin diferente aspecto riba derechonan di mucha cu ainda mester sigui traha riba nan pa mehora e calidad di bida di nos muchanan.

E programa di partido di AVP tin diferente punto cu ta enfoca riba e aspectonan aki. E puntonan ta bisa bon cla cu lo bay stimula hobennan pa den nan ambiente, na nan cas, nan haya chens di desaroya nan talentonan optimalmente. Tin hopi forma con por haci esaki.

E comunicacion entre mayor y yiu ta keda e base den nos hogarnan y famianan aki na Aruba. No ta un secreto cu den hopi hogar aki na Aruba e comunicacion ta bira menos pa loke ta tempo, door cu e mayornan mester traha. Pero di otro banda mester por hisa e calidad di comunicacion entre mayor y yiu.

Importante ta tambe pa trece dilanti cu ora mayornan ta traha, e yiunan ta keda na un cuido pa mucha y muchanan mas chikito ta keda na un crèche. E ley di Cuido y Centronan pa Mucha ta un ley cu sigur Gobierno tin’e prepara pa bin Parlamento y a traha riba dje pa asina Parlamento bay trat’e. E ley aki hopi aña atras a yega di bin Parlamento den un forma caminda cu Parlamento a aprob’e unanimamente y cu rekesitonan pa mehora e crechenan na Aruba cu ta un cantidad y ta facilita nos mayornan pa nan traha y tin nan yiu na un lugar safe.

Cambionan cu mester traha riba dje pa cu Centronan pa Mucha ta e.o.:
Higiena, Espacio, Seguridad pa nos muchanan chikito, Calidad di cuminda, Programanan educativo y weganan, Nivel y educacion di e lidernan y diferente otro punto mas cu ta ancra den ley pero cu alavez ta costa placa y cu lo mester pone fondo pa nan pa ehecutanan y tin un inspeccion debido riba e centronan pa mucha, particularmente esnan mas chikito di 0 pa 4 aña.
Tur esaki ta puntonan importante cu mester enfoca riba nan mas y cu den e añanan cu a pasa cada un a trata na aporta na nan.

Sinembargo e ley di Kinderopvang ainda tin algun aspecto cu e mester bin Parlamento pa e worde mehora y asina drecha e calidad di bida di nos muchanan den e orarionan di mainta y atardi ora mayornan ta traha pa nan ta na un lugar safe.

Den e programa di partido a enfoca tambe riba e studio di e rapport di UNICEF cu ta enfoca grandemente riba e tratado pa nos muchanan cual ta e reglamentonan cu ainda mester cumpli cune como pais. Como miembro di Parlamento Independiente e ultimo aña aki nos a bay Hulanda cu un delegacion di Parlamento caminda cu conhuntamente cu e Parlamentarionan di AVP, a haci un presentacion pa Tweede Kamer caminda a enfoca riba kico mas falta pa mehora e posicion di nos muchanan na Aruba.

Un di e aspectonan cu tur e paisnan den Reino a bay di acuerdo cune, ta pa introduci un Kinder Ombudsman, esta un protector pa muchanan pa loke ta nan derechonan. Esaki tambe ta un punto cu partido AVP tin ancra den su programa di partido pa e proximo 4 añanan cu sigur cu lo yuda contribui pa cumpli cu e tratado di nos muchanan pa loke ta e derechonan di nos hobennan.

- Advertisement -

DUNA COMENTARIO

Please enter your comment!
Please enter your name here