Westin Resort ta na benta un biaha mas
ORANJESTAD (AAN)– Sindicato di trahadornan di Aruba (STA) ta preparando e trahadornan di Westin Resort & Casino Aruba. Pa varios luna caba tin reunion nan andando. Segun presidente di sindicato STA sr. Diego de Cuba e hotel ta bay worde bende despues di eleccion , pero cu na e momentonan aki cu tin campaña un cantidad di situacionnan straño ta pasando den cushina di Westin Hotel.
E situacionnan di e trahado nan ta dificil. Segun presidente di STA ta berdad cu na momento cu un otro doño kier cumpra e hotel lo e mester worde bendi cu tur e situacion cu e hotel tin y tambe tur e trahado nan, pa asina e hotel keda funciona pa keda genera placa.
Sinembargo despues di dos luna cu e compra di e hotel pasa doñonan nobo lo bay haci un reorganizacion unda cu cambionan ta bin cu den e reorganizacion e doño nobo lo pidi ontbinding pa e trahado nan.
E doño nan nobo ta kere cu tin di mas trahado of cu nan ta trata di hala e trahado nan cu tin mas aña di servicio debi cu nan tin e salario di mas halto den e hotel.
Tur esakinan ta cay bao di reorganizacion pa asina baha gasto di e hotel.
Segun sr. de Cuba e trahadonan ta tuma nota cu tin basta dia cu e doño nan di Riu Palace Aruba Hotel ta bin reunionnan tur dia y ta cana rond den e hotel pa varios luna caba. Tin indicacion fuerte cu e motibo pa kico kier bende Westin hotel cu esunnan cu ta doño di hotel Riu ta debi cu nan kier haci e hotel un all inclusive hotel.
Na momento cu haci un hotel all inclusive e categoria di bo producto di turismo ta baha debi cu e turistanan ta yega Aruba cu tur cos pre paga y na unda cu nan no ta inverti na Aruba mes. Aruba no lo beneficia mucho na turistanan cu ta bin hotelnan cu ta all inclusive debi cu hotel, cuminda, transporte ta bin paga.
Na e momentonan aki esunnan cu ta bay tuma e hotel over ta haciendo un inventarizacion di e situacion pa nan por tuma e hotel over.
Segun sindicato Diego de Cuba pa dia prome di November hopi hende ta bay haya sorpresa na momento cu e hotel worde bendi. Actualmente e doño nan actual di Westin ta Aruba Hotel Enterprises. Actualmente tin un tension den e hotel debi cu e sindicato di e hotel su man nan ta mara debi cu e no tin mag di yama reunion cu su miembronan y tampoco saca afo loke cu ta sosodiendo den e hotel.
Segun presidente di STA si nan tribi di papia riba loke ta sosodiendo den e hotel nan lo kita nan for di trabao. E situacion na Westin ta tenso. Proximamente presidente di sindicato STA lo yama un conferencia di prensa unda cu lo publica potret di loke ya el a trece padilanti di loke e hotel ta produci pa por worde bendi y parti durante di campaña pa e minister di turismo.
Presidente di sindicato STA ta reta minister di turismo Otmar Oduber bay drenta un debate hunto cu ne pa asina aclaria diferente puntonan cu ta sosodiendo den turismo, sindicato STA ta para cla pa debati.
Sinembargo STA ta kere cu e trahadornan di Westin mester keda trankilo debi cu ta trahando riba un referendum. Na e momentonan aki ta trahando riba e documentonan unda cu e peticion a worde haci caba na mediador y si mester bay corte lo cana e caminda pa bay corte un biaha mas.
Segun sindicato STA si e referendum worde nenga por spera un welga cu e trahadornan cu ta miembro di sindicato STA lo sali pafo y busca nan derecho. STA ta boga pa e derecho di e trahadornan y lo sali na defensa di su miembronan tambe.
