Aunke Eddy Briesen y MEP a purba pasanan un fastball
ORANJESTAD (AAN): Den e dianan akio ta mas y mas taxista ta acercando Minister Otmar Oduber y pa gradicie pa su decision di para duro y no otorga mas permiso di taxi, fuera di e 400 existente.
Tur hende por corda cu Eddy Briesen a firma 53 toezegging pa taxi vergunning 2 dia promer cu Gobierno nobo a sinta, hungando asina politica barata den forma di un “afscheidsbeleid”. For di e 53 toezeggingnan aki mas cu mitad nunca a aplica pa taxi vergunning y hopi di nan tabata trata di su mes un campañadornan y coordinadornan, cualnan algun di nan te ainda ta traha cu Gobierno.
Den e forma aki Briesen a traiciona e confianza di e 400 taxistanan na Aruba y a kibra e moratorium cu tabata existi.
“Ki amor y ki curazon bo tin pa pueblo y transporte publico, unda cu despues cu bo a perde eleccion y pueblo ta manda bo cas, bo ta duna vergunning na 53 taxista, gañando y kibrando e confianza di e 400 taxistanan na Aruba” Minister Oduber a declara.
Desde cu Minister Oduber a tuma Ministerio di Transporte el a sigura cu e 53 vergunningnan aki no lo worde otorga tanten cu no tin un rapport di un estudio haci cu ta indica cu mester hisa cantidad di taxi na Aruba. E estudio aki a worde realiza y a confirma e posicion di Minister Oduber, esta cu na e momentonan aki no tin espacio pa mas taxi na nos isla. Pa tal motibo tambe e mandatario a tuma e decision di extende e moratorium pa taxi por lo pronto.
Diferente biaha caba Minister Otmar Oduber a sostene e posicion aki dilanti corte, pasobra e ta kere cu mester defende e taxistanan, si habri porta pa mas taxi ta pone e entrada di e taxistanan actual na peliger. Pesey e ta keda riba su punto cu por lo pronto no lo bin ningun taxi adicional. “Nos ta keda cu 400 taxi y por lo pronto no lo bin cu ningun mas”, Minister Otmar Oduber a duna di conoce.
