APA a completa ultimo fase di e destaho publico
ORANJESTAD (AAN): Cu un sentido di satisfaccion grandi ayera APA su gerencia a anuncia cu a yega e final di e destaho publico pa e proyecto di mudamento di Waf di carga di Oranjestad pa Barcadera.
E proceso di preparacion y realisacion di destaho publico pa e proyecto grandi aki, cual ta encera e mudamento di e Terminal di Container pa Barcadera, a tuma su debido tempo y esfuerzo pa a yega asina leu awe cu por anuncia cu e ultimo fase a ser completa.
E historia di e plannan pa desaroyo di Barcadera ta largo datando for di 1994, y ta mas amplio cu solamente e construccion di un waf multi-carga.
Pero pa APA e proyecto actual a inicia cu e publicacion di e destaho pa e contrato di concesion dia 15 di februari 2011. Despues di un trayectoria di evaluacion intensivo, finalmente a otorga e contrato di concesion na e compania local Aruba Stevedoring Company (ASTEC) NV, cu lo bay maneha e waf di multi-carga na Barcadera.
E di dos destaho publico den e proyecto a inicia dia 1 di februari di 2013, cu tabata regarda e contrato di construcción bou di encargo di APA. Diaranson dia 11 di september 2013, despues di un proceso di hopi analisis, negociacion y evaluacion, APA a acepta e oferta di e compania American Bridge, cu localmente lo traha cu ALBO/ArubaanseWegenbouwMaatschappij, pa construcción di e infrastructura maritimo.
APA su visión semper tabata pa realisa e proyecto cu garantia di exito sostenibel pa futuro. E proyecto di mudamento di e waf ta di vital importancia pa e diversificacion y expansion di Aruba su oportunidadnan economico.
E proyecto di mudamento di e waf mester diversifica nos economia di tal manera cu e efecto lo genera impacto positivo riba e desaroyo y oportunidadnan nobo pa e waf di carga y pa Zona Liber na Barcadera. Alabes e mester tin un efecto positivo den desaroyo y progreso di e industria crucero cual lo traduci su mes den aumento di barconan cu ta bishita nos waf di Oranjestad, cu consecuentemente, ta aumenta e impacto economico directo y indirecto pa nos pais.
E ta conta cu un inversion total substancial di AWG. 110 miyon. ASTEC lo inverti entre otro den ekiponan portuario, infrastructura, superstructura di e terminal di carga, mientras cu APA lo inverti entre otro den ekiponan naviero, mueye, dragado y reclamacion di tera. Hunto e ta resulta den e desaroyo industrial di un waf cu mester sirbi generacionnan pa bin.
Pesey den e proceso di destaho publico APA mester a tene cuenta cu hopi factor, principalmente e interes general di Aruba y di e empresa estatal di Aruba, pero tambe sin kita afo e interes comercial y posibilidad tambe di cualkier operador of interesado cu kier participa den e proyecto. Un no por a limita e otro y ta aki APA mester manaha un equilibrio husto den tur aspecto y interes.
E wafnan di Aruba mester bira wafnan di futuro sin cu structuranan of contractnan di pasado ta limita su posibilidadnan di desaroyo y crecemento. Pesey APA y su hunta di comisario y gobierno como accionista di e empresa, tabata debidamente prudente den maneho di e proyecto aki pa garantisa pueblo di Aruba un bon proyecto cu oportunidad pa crecemento y diversificacion di nos economia creando asina tambe empleo stabiel pa nos trahadonan.
APA ta desea di felicita e pueblo di Aruba cu e logro aki y reconoce y gradici alabes tur e partidonan interesa y e conseheronan cu a aporta na forma directo of indirecto na e proyecto aki, tanto recientemente como den pasado.Un palabra di gratitud special ta bay pa Minister Mike de Meza encarga cu APA y Minister President Mike Eman pa nan sosten pa haci esaki bira posibel. Pueblo di Aruba awor si Waf di carga ta bay muda pa Barcadera y waf di Oranjestad lo bira un waf di Crucero y den futuro di yatenan grandi turistico.
