DAO lo revisa ley di salario minimo, retiro, cesantia y ley di vakantie
ORANJESTAD (AAN): Den e ultimo añanan por a tuma nota cu tabata tin varios cambio cu a wordo haci na Departamento di Labor. Sinembargo e procesonan aki no a termina. E prome fase a caba y pronto lo sigui cu e di dos fase.
Pa straño cu e ta, den sector publico so tin regla den ley e sistema di balance di pago di cada persona cu lo traha como un ambtenaar. E pago pa un ambtenaar ta balansa den schaal. Sinembargo den sector priva e no ta regla pa ley.
DIARIO a combersa cu Sharitsa Luna Figaroa cu ta Bureau Manager di Directie Arbeid en Onderzoek (DAO) y ta duna di conoce cu den sector publico tin un trapi pa sigui unda cu nan ta evalua bo estudio y bo diploma cu bo tin y ta duna bo e derecho di salario cu bo mester gana abase di bo enseñansa.
Den sector priva loke cu solamente tin den ley regla ta e salario minimo cu ta 1636,70 florin cu a wordo adapta desde prome di februari di e aña aki.
E espacio ta keda habri pa tur doño di compania dicidi cuanto nan lo paga nan trahadonan, pero e no por ta mas abao cu e salario minimo. Si e trahado ta traha menos cu 40 ora e momento ey e trahado por wordo paga menos cu e salario minimo, tambe abase di e uurloon di e salario minimo.
Tin biaha tambe bo ta haya personanan cu ta wordo paga mas halto cu e pago di 8:55 cu ta stipula pa ley cu un persona por gana pa ora di e salario minimo actual, esaki ta sosode solamente si e persona ta traha pa ora y cu e no ta den servicio di 8 ora na un compania.
E intencion di DAO ta pa bin cu cambionan den ley. Sinembargo a cuminsa cu cierto cambionan caba for di 1 di April di e aña aki cu tabata e prome fase.
Segun Sharitsa Luna-Figaroa pronto lo cuminsa cu e di dos fase cu lo bay start y haci un analisis riba e leynan laboral unda cu e salario minimo ta un punto di discusion. Un comision di trie partiet cu ta encera gobierno,sindicatonan y DAO lo trata e parti aki.
Den e investigacion aki lo evalua tur cos pa asina analisa kico ta e miho ahustacion pa cu e salario minimo na Aruba y si ta necesario pa haci cambio na dje.
Doñonan di trabao cu no ta cumpli cu pago di salario minimo ta faltando respet na nos leynan y e ta castigabel. Tambe den e di dos fase lo trata diferente leynan manera di salario minimo, retiro, cesantia y ley di vakantie.
E intencion di Departamento di Labor ta pa trece un structura di nivel di pago den ley pa diferente funcion den e sector priva. E intencion di revisacion di tur e leynan aki ta pa evalua si ta necesario pa haci cambio riba e leynan.
