Arondino Croes a retira di MEP:
ORANJESTAD (AAN) – E candidato riba lista di MEP y ex parlamentario señor Arondino Croes, a convoca un conferencia di prensa relaciona cu su retiro for di e partido geel.
El a expresa cu oficialmente e ta anuncia su retiro for di Partido MEP, despues di dieseis aña di a milita den e partido y cu a participa den cinco eleccion y cu a representa nan tres biaha den Parlamento.
El a gradici tur e personanan cu a dune sosten durante e proceso electoral ultimo y na miembronan di prensa cu durante su ruedanan di prensa a dune cobertura cien porciento y cu cada un a contribui na informacionnan cu mester a trece na pueblo. El a expresa cu e ta hopi orguyoso di cada un miembro di prensa.
Na su 364 votador el a manda gradicimento di curazon pa nan sosten pasobra apesar di momentonan dificil di MEP, el a logra bay dilanti cu 30 porciento cu ta algo hopi positivo, mirando e resultado den e eleccion aki.
Tambe na tur e checkernan y na su famia cu a sostene durante e dieseis añanan aki den su carera politico.
El a subraya cu e decision aki no tabata facil mas ainda ora bo tin hopi tempo den un funcion, pero den bida cosnan ta cuminza y tin ora mester bisa “te aki mi a yega” y esaki ta e dia cu esey a sosode.
Señor Arondino Croes a indica cu tur a cuminza for di momento cu el a drenta den Parlamento pa reemplaza dr. Michael Kelly y cu el a haci tur esfuerzo pa haci un diferencia den e nivel, unda cu el a sa di mantene e discusionnan na nivel di intercambio di temanan den Parlamento y el a logra evita atakenan personal na un porcentahe hopi halto, el a atende 95 porciento di e reunionnan publico, incluso den campaña cu nan tabata bishita cas di hende.
El a expresa cu e no tabata contento cu e posicion cu nan a dune riba e lista di MEP tabata pe inaceptable pasobra nan a mande “bay guera bay muri” pero tog el a acepta e number cu el a haya bao di protesta.
El a consulta esaki cu su famia, sostenedornan y campañadornan entre dia 8 y 9 di Augustus y nan a bise for di e momento ey pa e retira, pero e kier a mustra cu e ta un profesional y kier a caba loke el a cuminza pa sali cara na laira y a keda durante henter e campaña.
Diasabra cu a pasa el a bolbe consulta cu tur e hendenan cu ta su tras y su famia y nan a sostene su decision di retira for di MEP.
E no tin di haber cu ningun oferta cu e por a haya pafo pasobra e no mester di esey, Arondino Croes a indica, y el a agrega cu e ta cera e capitulo aki cu ta Partido MEP y awor e ta bay reflexiona y wak kico e ta bay haci.
El a refuta kico ta wordo specula riba facebook cu el wordo cumpra, y el a subraya cu su dignidad no ta wordo cumpra riba mercado.
Señor Arondino Croes a subraya cu e tin su estudio academico, e ta un profesional y e por comparti su experiencia y conocimento sea den sector priva of publico.
El a agrega cu e manera con e desaroyonan interno a bay durante e campaña tambe tabata cla y cu tabata tin zonificacion den e partido MEP. Ora el a mira con esaki a bay e ta haya cu tin hopi pa drecha internamente y den e aspecto aki e no ta sinti su mes comodo tampoco.
El a desea tur cu ta bay drenta den Parlamento, entre otro mr. Andin Bikker hopi exito, y pueblo a papia palabra cla “voz populi ta voz Dei” y tin cu respeta esaki.
