Home Editorial Editorial: E NIVEL DI MEP NO A PROGRESA

Editorial: E NIVEL DI MEP NO A PROGRESA

1
0
SHARE
- Advertisement -

            Si bo lesa tur e basuranan cu algun miembro y fanatico di Mep ta declara, bo no por scapa di e conviccion cu na lugar di progresa y alcanza un nivel sikiera civiliza, e partido a cay den un decadencia mas profundo.

            Sinta gaña otronan cu MEP a progresa durante e eleccion cu a caba di pasa ta propio di hendenan cu ta kere cu tur loke nan bisa no ta ser analiza, y ni sikiera cuestiona, sino cu nan palabranan ta biblico. Wel, pa cuminza MEP no a bay adilanti den voto ni den asiento den Parlamento. Den voto nan a keda na rand di “lo mismo”, y den asientonan nan a perde 1. Lubida ta ken a bandona partido o a ser saca di partido; mira e hecho pa loke e ta: MEP den e eleccion anterior a logra 6 asiento clean y 2 restzetel, loke ta suma, den cualke matematica, 8 na total. Durante e eleccion reciente el a saca 6 asiento clean, o sea cu e no a bay padilanti, pero a perde 1 di e 2 restzetelnan cu e tabata tin, pa totaliza 7 asiento den Parlamento, mientras cu AVP a bay padilanti pasobra el a saca 12 clean cu 1 restzetel pa un total di 13. Esaki ta progreso! Esaki ta realidad, no e mentiranan cu algun den MEP ta lanza pa purba sconde su derota o disfrase cu argumentonan patetico.

            Henter Aruba a vota contra MEP, cu e excepcion di Santa Cruz, cu semper tabata e baluarte di MEP. Pero, hasta na Santa Cruz nan a bay atras den varios distrito, y a gana den algun cu e diferencia di apenas 1 o poco mas porciento. Si bo analiza e situacion bon, ta comprendible cu MEP a gana na Santa Cruz pasobra ta ey e ta concentra su esfuerzo, sin tuma na cuenta cu e Pueblo di Santa Cruz mes no a progresa cu e Gobiernonan di MEP. Pa describie na un manera comparativo cu hendenan por compronde, Santa Cruz no ta nada otro cu un isla di rikeza rondona pa un laman di pobreza! Y e rikeza ta den man di un solo famia, cu su ramificacionnan. Pero, e Pueblo mes no a disfruta di e progreso di nan ciudad.

            Mi no ta kere cu MEP mester busca un lider nobo den e persona di Glembert pasobra su record no ta recomende. Ta mi opinion personal cu  nan mester buske den Dangui, kende si a compronde cu e fracaso grandi di MEP den e eleccion cu a caba di pasa ta debi na e hecho cu e no a cambia di tono, e no a eleva su nivel, e no a papia un idioma civiliza, sino cu el a cay den e mesun trampa di decadencia di atakenan personal y riba un nivel hopi abao. Hendrik no tabata kier Glenbert den partido anteriormente, sino e lo a enfrenta Nel y obligue acepte riba e lista di MEP. Pero, Nel si a insisti cu su yiu mester bay riba lista, y el a logre tambe. Y el a haya razon, pasobra den su prome presentacion, Dangui a haci un bon papel, y den un declaracion cu mi a scucha di dje, el a papia un idioma politico hopi avanza. Mi ta sigur cu e si a compronde cu of MEP ta cambia su tono, of e partido lo enfrenta epocanan di turbulencia cu lo pone perde eleccion tras di eleccion pa su nengamento di ingresa den e mundo moderno di politica, o sea discuti e issuenan cu tin riba mesa, y no e personanan cu e no ta gusta.

Cu mi nan ta perde nan tempo pasobra mi no tin voto pa nan kita. Miho nan reuni cu Dangui y lague duna nan su opinion kico mester sosode pa MEP e bolbe bira e partido glorioso cu Betico a funda, y cu su tata, Nel, a hiba te victorianan importante. Betico a construi MEP, el a dune forma, el a encabeza e lucha pa Independencia te logra e regalo cu Hulanda a duna Aruba, o sea Status Aparte. Nel, en cambio, a solventa e partido, el a pone den likidez, el a elimina tur e deudanan cu e partido tabata tin, y djey, como lider inidiscutible, a pone gana varios eleccion.

            Ta en base di e analisis aki mi ta bisa cu Dangui tin hopi mas oportunidad pa bira lider, y cu e ta e persona indica pa cambia e rumbo di derota di MEP pa uno di stabilidad y progreso, y probablemente di victoria. Cerca mi e lo ta semper bon bini, y e por conta for di awor caba cu mi apoyo si e sigui riba e rumbo cu ya el a traza caba y cu ta e unico cu por rescata MEP di su racha di derotanan Electoral reciente.

- Advertisement -

DUNA COMENTARIO

Please enter your comment!
Please enter your name here