Home General MEP ta yuda pueblo den pueblo y no riba un dushi stul...

MEP ta yuda pueblo den pueblo y no riba un dushi stul den Parlamento

0
0
SHARE
- Advertisement -

Segun Evelyn Wever-Croes:

ORANJESTAD (AAN) – Fraccion di MEP a sera aña parlamentario cu un sentimento mixto, ya cu a dispidi di un colega cu mas cu 30 aña den politica cu ta sr. Edison Briesen.

Asina e lider di MEP y awor lider di fraccion alavez, mr. Evelyn Wever- Croes, a declara den entrevista cu Matutino DIARIO.

Awor MEP ta cuminza un etapa nobo cu un fraccion grandi di siete parlamentario dedica y cu hopi animo pa lucha pa e causa.

E dama a subraya cu nan a prepara nan mes cu diferente training, y nan a reparti e trabao den diferente area.

Sra. Wever- Croes a expresa cu nan ta cla pa un oposicion firme y constructivo, pasobra nan ta ripara cu e gobierno cu ta bay sinta no tin solucion pa tur e problemanan cu Aruba tin. For di oposicion nan ta dispuesto pa duna un man, door di haci un oposicion firme y critico y mustrando na mes momento kico segun MEP e solucionnan mester ta.

El a duna di conoce cu e mes lo asumi e rol di lider di fraccion, pasobra ya el a restructura su partido. Sra. Wever- Croes a subraya cu e tarea ta dificil pa henter Aruba pasobra nos pais ta bay pasa den momentonan dificil, y tin retonan grandi nos dilanti pasobra nos gobernantenan no ta realiza esaki, pero for di oposicion MEP lo duna su parti pa bienestar di nos pais en general.

MEP ta bay haci oposicion den pueblo pasobra segun mr. Evelyn Wever-Croes tras di un stul dushi no por yuda nos hendenan, aworaki nan ta yudando hopi hende cu nan placa no ta yega y cu a vota pa AVP pensando cu e situacion ta bay mehora, pero awor nan ta realiza cu lo tarda pa mehora.

Nan lo ta presente den Parlamento ora cu ta rekeri y si nan por duna un aporte constructivo, pasobra nan a sali di un Parlamento unda nan aporte tabata nulo, pasobra Presidente di Parlamento no tabata interesa den nan aporte, y nan iniciativanan di ley tur a keda scondi den lachi, proposicionnan, amienda, ta wordo tira den bari di sushi prome cu nan yega na votacion pa e parlamentarionan di AVP, y den e ambiente aki nan a traha durante cuater aña.

Segun Evelyn Wever- Croes a subraya cu e ora ey e ta puntra su mes na unda presencia di MEP ta mas rekeri? Si e Presidente nobo di Parlamento ta dispuesto pa cambia esey pa duna oposicion un aporte real, naturalmente MEP lo ta presente den Parlamento, pero si no lo ta den pueblo pa yude.

- Advertisement -

DUNA COMENTARIO

Please enter your comment!
Please enter your name here