Home General Presidente nobo di Parlamento lo eherce su funcion hopi estricto

Presidente nobo di Parlamento lo eherce su funcion hopi estricto

1
0
SHARE
- Advertisement -

ORANJESTAD (AAN) – Drs. Marisol Lopez- Tromp, awor den fraccion di AVP, a keda elegi cu 13 voto na fabor, como Presidente di Staten pa e periodo 2013-2017, den votacion cu a tuma lugar diaranzon ultimo.

Matutino DIARIO a acerca e Presidente nobo di Parlamento unda el a elabora riba kico e reto aki ta nifica pe.

El a expresa cu e ta hopi contento di por a carga sosten di Parlamento cu gran mayoria, pa por eherce e funcion importante di Presidente di Staten.

El a subraya cu e posicion di Presidente di Staten ta e di dos mas importante na Aruba, despues di e funcion di Gobernador.

Esaki ta un responsabilidad grandi no solamente pa dirigi reunionnan den Parlamento, pero tambe e ta un funcion representativo di Parlamento di Aruba pa comunidad.

“Mi ta hopi conciente cu nos tin varios reto nos dilanti, entre otro pa sigui eleva e nivel di Parlamento, pa sigui tin reunionnan di contenido, pa atende e inkietudnan cu tin den comunidad den e sala aki, y mas importante pa controla y vigila cada paso cu nos gobernantenan duna, y naturalmente pa trata iniciativanan di ley den Parlamento, kiermen un cantidad di trabao cu tin, cu ta warda nos”, e dama a expresa.

Drs. Lopez- Tromp a subraya cu como parlamentario semper el a purba di eleva e nivel den Parlamento, no solamente pa loke ta concerni contenido pero tambe e lenguahe cu ta wordo uza y comportacion.

Drs. Marisol Lopez- Tromp a menciona cu el a yega di sinta na diferente banda di Parlamento y tambe el a bay den Gobernacion y ta conoce e aparato hopi bon, y e lo dirigi na un manera estricto e reunionnan di Staten.

“Nos tin cu sigui duna Parlamento e balor y lugar cu e tin, pasobra hopi biaha den comunidad tin e pensamento cu Parlamento ta un apendix di Gobierno, of cu e ta un stempel parliament, lubidando cu nos tur den Parlamento ta manera hefenan di e gobernantenan, nos tin cu controla y vigila nan, y den e caso aki haci e tarea debidamente”, Presidente nobo di Staten a acentua.

El a agrega cu nan tin cu controla e presupuesto di gobierno, y mester haci e na un manera mucho mas fuerte, y mirando e constelacion di e Parlamento aki, por mira varios miembro nobo cu a bin, aparentemente, cu hopi gana pa traha. E dama a indica cu no obstante unda cada miembro di Staten ta sinta, nan tarea ta keda esey. “Hopi biaha hende ta lubida cu e rol cu Parlamento tin, ta hopi poderoso y esey ta e meta pa mustra, e cuater añanan nos dilanti”, Parlamentario Lopez-Tromp a reitera.

Diaranzon mes el a cuminza cu su rol di dirigi e prome reunion cu Comision Central y un reunion publico pa trata e topico di e retiro di e gobernantenan anterior y tambe e nombramento di e gobernantenan nobo.

Tambe den presentacion di e Gabinete Eman Dos, e dia aki mes nan a puntra riba e plan di gobierno y con Parlamento por yuda den esaki.

- Advertisement -

DUNA COMENTARIO

Please enter your comment!
Please enter your name here